A Concellería de Vías e Obras do Concello de Ponteareas, que dirixe María Jesús Garrote, vén de rematar os traballos de mellora viaria en dúas pistas nas parroquias de Areas e Arnoso. Trátase, no de Areas, dunha pista de terra que se atopaba en moi malas condicións, mentres que a de Arnoso, permitirá a reordenación do tráfico nas inmediacións da Casa Cultural de Arnoso.

Os traballos desenvolvidos en Areas, permitiron o asfaltado dun tramo que conecta coa pista que leva ao depósito de auga. Nesta obra foi preciso unha ampliación do orzamento para poder acometer o ancheado da pista en diferentes tramos o que supón unha mellora á hora da súa utilización.

No referente a Arnoso, os traballos consistiron no asfaltado dunha pista no entorno  da Casa Cultural da parroquia. Esta obra demandada dende hai tempo polos veciños permite reordenar a circulación coas dúas vías existentes, que pasan a ser de sentido único, no lugar onde esta situada a casa cultural e varias vivendas. Esta reordenación do tráfico mellora a seguridade viaria da zona, xa que o ancho das dúas pistas fai difícil a circulación en dobre sentido.

Os traballos realizados en ambas as dúas vías, incluíron a nivelación do terreo, cachados e recrecido de arquetas e pozos, pavimentación e marcado da estrada e mellora das cunetas e pasos de augas.

María Jesús Garrote, que cualificou como “moi bo traballo” as obras executadas, quixo destacar a importancia das mesmas “xa que se trataba de actuacións demandadas pola veciñanza” e que permitirán que “tanto vehículos como peóns poidan circular por estas vías con garantías”.