Alumnos do Antonio Palacios reflicten nun traballo sa pegada que deixou o arquitecto que da nome ao seu colexio

Alumnas e alumnos de 6º de Primaria do Colexio Antonio Palacios, de Torneiros, desenvolven dende hai meses un interesante traballo sobre a Antonio Palacios: o seu proxecto baséase na idea de achegarse ao arquitecto  achegándose ás obras que deixou no Porriño, a súa vila natal.

A ‘Ruta Antonio Palacios’, levou a estas e estes estudantes, coordenados por Mirian C.Leiros e a supervisión de Andrés Vieitez, director do centro, a visitar e estudar polo miúdo a Fonte do Cristo, primeira das obras deseñada por Palacios na súa terra; o Concello, construído entre 1921 e 1924; a Botica Nova, proxectada tamén coma vivenda para o seu irmán, José Palacios, e o Templete, situado antigamente na Gran Vía madrileña coma acceso á estación de Metro de San Luis.

Este traballo plasmouse no blog www.diversostibes.blogspot.com en un cartaz editado en tres idiomas: galego, castelán e inglés, no que se recollen, xunto con material fotográfico, unha explicación breve das obras sinaladas, un código QR, no que se amplía esa explicación, e un plano no que se sinala a localización de cada pegada que deixou Antonio Palacios no Porriño.

Un destes cartaces foi entregado polas alumnas e alumnos, este venres pasado á concelleira de Educación, Lourdes Moure, e ao alcalde accidental, Manuel Carrera, coincidindo coa visita dos estudantes ao Concello.