O Concello de Mos asegura que "fixo unha importantísima recuperación do patrimonio histórico municipal rehabilitando a antiga Casa Reitoral de Petelos e adaptándoa para Centro de Día. Estes traballos, que se iniciaron fai máis de seis anos e se levaron a cabo en varias fases, prolongaranse no tempo porque aínda queda moito por facer”, segundo se informou onte dende a administración local mosense.

A alcaldesa Nidia Arévalo, e a concelleira de Política Social, Sara Cebreiro, anunciaron onte que o Concello ten programados tres plans de actuación no Centro de Día que está a xestionar AFAGA (Asociación de Familiares de Enfermos de Alzheimer e outras Demencias de Galicia): un plan de actuación urxente, un plan a curto prazo e outro a medio prazo.

O plan de actuación urxente terá un inicio inminente, xa que os traballos empezarán o luns da semana próxima, día 20 de marzo. As obras que se acometerán e que están supervisadas polo arquitecto municipal serán de fontanería, de albanelería para o óptimo mantemento das estancias interiores, e da adaptación dun espazo a modo de pequeno comedor, -no que se instalará un fregadeiro, etc.-, para preparar e servir as merendas dos maiores usuarios do Centro.

Para o plan a curto prazo buscarase financiación da consellería de Política Social. A realización do proxecto no que o Concello está traballando precisará unha inversión  duns 100.000 euros que se destinarán a habilitar varias salas a maiores na zona sur do edificio da Casa Reitoral e facelas operativas para o uso de terapias e actividades con maiores, seguindo o método de recuperación empregado ata o de agora.

A medio prazo contémplase unha intervención máis ambiciosa para a que a rexedora local, Nidia Arévalo, e a concelleira de Medio Ambiente e Urbanismo, Julia Loureiro, xa lle solicitaron fondos ao Director Xeral de Desenvolvemento Rural e Director da Axencia Galega de Desenvolvemento Rural, Miguel Ángel Pérez Dubois, nunha recente visita ao Concello de Mos. A inversión necesaria neste proxecto de continuación da obra no Centro de Día superaría os 200.000 euros.

Neste sentido Arévalo declara que “o que nos preocupa dende o equipo de goberno local e continuar atentendo aos nosos maiores e que nun futuro, ademais de atender a enfermos de Alzheimer o centro poida estar ao servizo da Terceira Idade en xeral, que sexa un espazo de convivencia onde poidan pasar o seu tempo de ocio e tempo libre”.

Así mesmo a concelleira Cebreiro destacou o gran e intenso labor que xa se está a facer nestas instalacións que durante o ano 2016 atenderon a un total de 49 usuarios e as súas familias. Actualmente os martes e xoves de 17.00 horas a 20.00 horas un grupo de 15 maiores enfermos de Alzheimer recibe terapia de AFAGA no Centro de Día de Petelos, e a edil informou hoxe de que agora duplicarase o servizo cun novo grupo doutras 15 persoas que serán atendidas os luns e mércores no mesmo horario de tarde. Ademais ampliaranse as actividades organizadas nestas instalacións e vanse organizar cursos abertos para todos os maiores interesados baixo o título de “Exercita a túa mente” e a finais de ano, no último semestre, impartirase un curso de cuidador/a para persoas con familiares dependentes ao seu cargo que se está a organizar e tramitar coa Xunta de Galicia.

“Queda así demostrado”, declararon as representantes municipais, “que o que máis nos preocupa é seguir atentendo aos nosos maiores pero tamén recuperando o noso patrimonio, por iso ampliamos o convenio co Bispado sobre a antiga Casa Reitoral de Petelos durante 4 anos máis. E somos partidarios de conveniar co Bispado porque iso revirte en beneficios para os veciños de Mos en xeral e os de Petelos en particular”.

"O triste, neste sentido, é que un grupo político da Corporación Municipal como é GañaMos, non pare de poñer paus na roda á xestión muncipal e moi especialmente sobre o Centro de Día. Precisamente no último Pleno sacaron reiteradamente este tema acompañándoo de críticas infundadas" explican. A este respecto Arévalo e Cebreiro consideran que “é lamentable que un partido político da Corporación estea en contra tan frontalmente dun Centro que aúna dous fins máis que loables como son a recuperación dun importante patrimonio histórico e cultural mosense, e o coidado dos nosos maiores”.

Sen embargo -din- "as súas críticas e denuncias non lles valen de nada, pois ata tres veces levaron o expediente da antiga Casa Reitoral de Petelos á Fiscalia e as tres veces llo arquivaron pola inconsistencia das súas acusacións".

Alcaldesa e concelleira de Política Social remataron as súas declaracións pedíndolles aos membros de GañaMos que “se aclaren, pois sí queren que se invirta na recuperación do Castro de Torroso a pesares de que os terreos son propiedade de veciños particulares, pero non queren que se invirta na recuperación da antiga Casa Reiteral de Petelos porque é propiedade da Igrexa”. “En política ante todo hay que ser coherentes e consecuentes, porque senón enseguida se lle pilla a un nun renuncio; por iso señores, deixen a demagoxia e opten pola coherencia que mellor lles irá”, concluíron.