Con motivo do Día Mundial da auga que este ano leva o lema “Augas Residuais”, mañá 22 de Marzo o Consorcio de Augas do Louro súmase á iniciativa da Asociación Española de Abastecementos de Auga e Saneamentos (AEAS) e celebrará a súa 1a xornada de portas abertas na EDAR de Guillarei, durante a cal se realizarán ademais varios actos conmemorativos.

Os interesados en visitar as instalacións da depuradora, deberán cubrir a solicitude de visita dispoñible na web www.consorciodolouro.es e enviala á dirección de correo electrónico indicada. Estableceranse 3 quendas de visita, a primeira ás 10:00, a segunda ás 12:00 e a terceira ás 16:00, en función do número de inscritos e cun máximo de 30 persoas por quenda.

Outros actos previstos polo Consorcio para esta xornada, serán a presentación da 2a Edición do Concurso de Debuxo para escolares e a publicación da app Smart aqua que pon a disposición do usuario un servizo adaptado ás novas tecnoloxías.