Os sete alumnos/as da especialidade de Deseño de Produtos Gráficos do Obradoiro de Emprego ‘Mos Verde’ que se clausurou a semana pasada levaron a cabo cun inmellorable resultado unha ambiciosa iniciativa consistente na elaboración dunha publicación sobre os recursos medioambientais do Concello de Mos. Trátase do libro titulado ‘Mos espazo de augua... espazo de vida’.

Nel recóllense fotografías, rutas de acceso e coordenadas xeográficas dos recursos naturais hídricos mosenses e das construcións que ao redor deles se forman.

Ao longo das máis de 100 páxinas, 118 concretamente, sucédense todo tipo de elementos relacionados coa auga entre os que se atopan muíños, fontes, pontes, etc…

Este volume constitúe unha viaxe virtual polas dez parroquias mosenses, xa que o libro clasifícase a razón dun capítulo por parroquia. En cada parroquia pódese atopar a xeolocalización e o mapa da ruta da auga mosense, ademais das fotos máis significativas de cada lugar a destacar.

Grazas a esta publicación fíxose tamén un repaso do inventario patrimonial do Concello de Mos e realizáronse novos descubrimentos e inclusións neste, que ascenderon a 41 elementos inventariados a maiores. Ata o de agora constaban no inventario 103 elementos.

 

A publicación foi elaborada polos alumnos/as da especialidade de Deseño de Produtos Gráficos do Obradoiro de Emprego ‘Mos Verde’

 

En total inventariáronse e xeolocalizáronse no libro 144 elementos relacionados cos recursos hídricos mosenses: 57 muíños, 65 fontes, 8 lavadoiros, 5 pontes, 3 parques (nos que existen recursos hídricos, por suposto en Mos hai moitos máis parques), 1 muíño de man romano na parroquia de Guizán, unha canle granítica da chan de Mos e verea tradicional en Louredo, unhas pías, as Pías de San Pedro en Cela;  e outros achados.

Dos 57 muíños 7 atópanse na parroquia de Tameiga, 6 en Sanguiñeda, 5 en Petelos, 7 na parroquia de Mos, 5 en Dornelas, 8 en Cela, 3 en Torroso, 8 en Pereiras, 7 en Louredo e 1 en Guizán.

Das 65 fontes 7 atópanse na parroquia de Tameiga, 9 en Sanguiñeda, 6 en Petelos, 6 na parroquia de Mos, 8 en Dornelas, 15 en Cela, 3 en Torroso, 2 en Pereiras, 2 en Louredo, e 7 en Guizán. Destaca a enorme cantidade de fontes existentes na parroquia de Cela, que case duplica en número á seguinte parroquia en cantidade de fontes que é a de Dornelas.

Respecto deste traballo dende o Concello de Mos quedouse tan satisfeito que a alcaldesa mosense, Nidia Arévalo, anunciou que será empregado como regalo institucional, como elemento de promoción turística, e que o deseño da portada estamparase en elementos publicitarios tales coma por exemplo vallas, faldóns en prensa, etc.
Sobre o traballo destes rapaces e rapazas a rexedora local declarou que “lles auguro unha carreira de éxito profesional no sector, vista a calidade dos resultados obtidos nas páxinas deste libro. A eles/as darlles as grazas polo seu traballo e implicación na elaboración deste volume, labor no que, dou fe, depositaron os seus máximos cariño e dedicación”. Así mesmo o concelleiro de Promoción Económica, Emprego e Novas Tecnoloxías, Óscar Soto, comentou que “dende esta concellería continuaremos con esta labor de convocar e organizar Obradoiros de Emprego en colaboración coa Xunta de Galicia, en vista dos bos resultados obtidos”, “non só se lle dará continuidade, senón que se intensificará se cabe a labor, visto que non só e efectiva, senón que xenera traballos de calidade altísima e moi profesional, como se pode comprobar a través das páxinas deste libro”, concluiu o edil.