Intercambiar experiencias sobre a recuperación, sinalización e promoción do Camiño Xacobeo foi o obxectivo da visita que onte realizaron ao Concello de Oroso o  alcalde de Tui, Enrique Cabaleiro González, e a concelleira de Urbanismo e Facenda, Yolanda Rodríguez Rodríguez. Foron recibidos polo alcalde orosán, Manuel Mirás Franqueira, e os concelleiros de Cultura, Luís Rey Villaverde; Turismo, Vanesa Boo Martínez; e Obras, Eduardo Veiras Rey.

Tui é o punto de partida do Camiño Portugués en Galicia e Oroso forma parte do traxecto do Camiño Inglés. Ambos mandatarios abordaron as potencialidades que o paso do camiño ten polos seus municipios ao tempo que coincidiron en problemas coma os da deficiente sinalización, aos que hai que buscarlle a mellor solución posible.  Enrique Cabaleiro apuntou que “sempre é importante intercambiar vivencias sobre os Camiños de Compostela, tanto en Oroso como en Tui. Queremos que este nexo se consolide porque os Camiños de Santiago son fundamentais para o desenvolvemento económico, social e cultural de ambas vilas”. Mentres o alcalde de Oroso, Manuel Mirás indicou que “con este tipo de intercambios de experiencias entre o Camiño Inglés e o Camiño Portugués estamos facendo máis grandes ambos Camiños” e confirmou que Oroso devolverá a visita para coñecer sobre o terreo as características do Camiño Portugués.

Na visita percorreron varios tramos do Camiño Inglés ao seu paso por Oroso, en concreto no lugar de Baxoia e na entrada de Sigüeiro, polo paseo do Río Carboeiro. Así mesmo, tiveron a ocasión de coñecer emprazamentos como o castro de Vilalbarro ou a Fonte da Santiña, antes de visitar o Centro de Estudos e Investigación do Camiño Inglés, CEICI, onde puideron ver o traballo que se desenvolve nesta entidade dirixida por Cristóbal Ramírez e distinguida cun dos galardóns dos Premios Camiño de Santiago 2016, convocados por Turismo de Galicia.

 O CEICI, emprazado no centro cultural de Sigüeiro, é unha iniciativa do Concello de Oroso dirixida a investigadores sobre o Camiño Inglés, xa que conta cun importante fondo bibliográfico e audiovisual sobre esta ruta Xacobea. Ramírez explicou que “o obxectivo é converter ao CEICI no referente en todo o que sexa investigación sobre o Camiño Inglés”. Así, explicou que o centro orosán conta con máis de 200 documentos, case un milleiro de  fotografías de alta definición e vídeos curtos sobre a materia que están a disposición dos investigadores de maneira gratuíta. Así mesmo, o Concello de Oroso realizou unha selección de informacións en revistas e xornais sobre o Camiño Inglés, que foron catalogadas e ás que se pode ter acceso no local no centro cultural de Sigüeiro.

Ramírez explicou á delegación tudense as distintas accións promocionais que se desenvolven dende o CEICI para buscar a súa proxección tanto internacional, como o Certame Internacional do Camiño Inglés, como local, coas unidades didácticas sobre ilustres peregrinos repartidas entre o alumnado de Oroso ou o Punto de Información ao Peregrino na piscina municipal. Ademais, adiantou que “queremos facer un curso de verán dentro da UIMP, cuxa xestión está bastante avanzada”.

A delegación tudense levou como agasallo unha selección de dípticos, trípticos e folletos informativos sobre o Camiño Inglés, realizados tanto polo Concello de Oroso como pola Deputación da Coruña. Tras asinar no Libro de Honra do CEICI, o alcalde de Tui aproveitou para convidar á delegación orosá a visitar o Camiño Portugués ao seu paso pola localidade tudense.