O Diario Oficial de Galicia publicaba esta semana (http://bit.ly/2nlG7nw) a orde pola Consellería de Medio Ambiente e Ordenación do Territorio outorga a aprobación definitiva ao Plan Xeral de Ordenación Municipal (PXOM) de Soutomaior e que entrará en vigor aos 20 días da súa publicación no Boletín Oficial da Provincia. A aprobación desde instrumento de planemanto representa un importante avance para o concello, que ata o momento carecía de planeamento propio e rexíase polas Normas subsidiarias de planeamento municipal do ano 1989, aprobadas hai case tres décadas.

O novo planeamento de Soutomaior pon en valor o patrimonio natural e paisaxístico do concello, pois máis do 80 por cento do termo municipal cualifícase como solo rústico maioritariamente de especial protección; e contrarresta o déficit de espazos públicos e zonas verdes de dominio e uso público. Ademais, estrutura os 29 núcleos rurais delimitados en base á parroquia como institución básica de ordenación completada pola figura dos barrios, que agrupan diversos asentamentos próximos entre si.

Por outra banda, o novo PXOM –no que a Xunta colaborou con máis 87.000 euros- elimina os usos inadecuados nas distintas clases de solo, así, se incorporarán novos usos potenciando a oferta hoteleira e reducirase o solo industrial co obxectivo de adaptalo á demanda real e ás posibilidades de xestión municipal. No caso concreto da vila de Arcade, o solo industrial eliminarase por completo por contar con escasas opcións de crecemento e atoparse nunha situación de abandono.

 

Acadar a aprobación do plan xeral supón un claro avance para o municpio  que, ata o de agora, se rexía polas normas subsidiarias de planeamento municipal, vixentes dende hai case tres décadas

 

Outro dos puntos relevantes do novo planeamento é que serán aprobados 6 ámbitos de solo urbanizable delimitado, un deles constituía un asentamento xurdido á marxe do planeamento que o PXOM regulariza ao abeiro da disposición transitoria 13ª da LOUG. Tamén quedarán perfectamente identificados e delimitados os dous núcleos urbanos que son Soutomaior e Arcade.

O terceiro PXOM aprobado na actual lexislatura
Co plan xeral de Soutomaior, xa son 3 os plans xerais de ordenación municipal que se aproban na actual lexislatura e 61 aprobados por este Goberno. Ademais, con Soutomaior suman xa 94 os concellos que dispoñen de PXOM actualizado e de calidade.

A tramitación dun PXOM é un traballo longo e nada sinxelo, pero o Concello de Soutomaior logrou aprobalo na metade de tempo -3 anos e 4 meses, cando a media está arredor dos 6.

Simplificar os trámites administrativos é parte do compromiso do Goberno galego cos concellos, por iso, ademais de aprobar o regulamento da Lei do Solo só seis meses despois da entrada en vigor desta norma -para dotar aos concellos de instrumentos sólidos e de seguridade xurídica-, creouse o informe único autonómico, que evita que os concellos teñan que solicitar informes sectoriais por separado e, ademais, fixa nun prazo de 3 meses para informar e entende o silencio administrativo como positivo.