A saída didáctica organizada pola ANPA "Adagio", e coa colaboración do Concello e da dirección do centro educativo, permitirá ao alumnado do Conservatorio e Escola de Música municipais desprazarse á Casa da Música do Porto o día 9, a fin de asistir ao Concerto da Banda Sinfónica Portuguesa con Douglas Bostock -Director da Tokio Kosei Wind Orchestra-, que servirá de complemento á súa formación educativa. O número de inscricións sobrepasa as previsións iniciais, polo que o Concello contratará dous autobuses para facer a viaxe.

Preto de 80 persoas irán gozar desta experiencia na cidade do Porto, que vai “na liña de mellorar a calidade educativa proxectada pola Concellaría de Ensino en colaboración co centro para ampliar os coñecementos e vivencias musicais”, expón a edil da área, Cristina Fernández.

A Banda Sinfónica Portuguesa é unha asociación cultural sen fins lucrativos, apoiada polas escolas de ensino artístico especializado Academia de Música de Costa Cabral (Porto) e o Conservatório de Música do Porto, sendo financiada pola Direcçao Geral das Artes do Goberno de Portugal. A dirección artística está a cargo do mestre Francisco Ferreira, aínda que nesta ocasión Douglas Bostock, director da Tokio Kosei Wind Orchestra, será o encargado de conducila.

Os participantes da saída, entre outras actividades, visitarán o edificio da Casa da Música, deseñado polo arquitecto neerlandés Rem Koolhaas. A principal característica do proxecto arquitectónico é a continuidade visual que se estabelece non só entre o interior e o exterior, mais tamén entre os propios espazos de referencia dentro do edificio. Unha relación de misterio, unha ambigúidade que provoca os sentidos, unha sensación de “caixa de sorpresas” que acompaña o percorrido do inicio ao fin.