A Consellería do Mar, a través do ente público Portos de Galicia, está a investir máis de 30.000 euros na mellora do peirao de Panxón, no municipio pontevedrés de Nigrán. Así o comunicaron o presidente do ente público, José Juan Durán, e o delegado territorial da Xunta en Vigo, Ignacio López Chaves, nunha recente visita á zona.

A Consellería do Mar ten en execución diversas obras de adecentamento das instalacións portuarias, que se suman ás xa executadas para a reparación das deficiencias eléctricas e do paseo de madeira. Así mesmo repúxose tamén a boia danada polo temporal Kurt na primeira fin de semana de febreiro.

En concreto, a día de hoxe estase a reparar o espaldón e a fachada marítima do edificio do club náutico así como a limpeza das caras interior e superior e pintado en cor branca. Tamén se está a realizar o saneado das zonas oxidadas das barandas no peirao e o repintado, ademais da limpeza da superficie de baliza e pintado nas cores que corresponde segundo os códigos de seguridade. Tamén se está a levar a cabo a reparación da instalación eléctrica do peirao e a reconstrución do apoio do cantil da rampla de descarga. O remate das obras está previsto para as vindeiras semanas.