Ao longo de todo o presente mes de abril a alcaldesa de Mos, Nidia Arévalo, a concelleira mosense de Cultura, Sara Cebreiro, a edil de Participación Cidadá, Kely Monzón, e o enxeñeiro agrónomo alemán e botánico experto en rosas, Oliver Weiss, están a visitar as asociacións do municipio nas que se imparten cursos do programa Tempo de Lecer para facerlle entrega aos seus alumnos e alumnas dun agasallo moi especial, un rosal para prantar nos seus domicilios.

O obxectivo desta iniciativa, enmarcada dentro das accións de promoción de Mos como ‘A Rosa do Camiño’ (de Santiago) e dos preparativos de cara á vindeira celebración da Festa da Rosa no mes de xuño, é, segundo explicaron Arévalo e Cebreiro, o de “fomentar a rosa, que é o símbolo do noso Concello e emblema do escudo municipal, recuperar a prantación e cultivo de rosais que había antano nas fincas das vivendas de Mos e potenciar a participación no Concurso de Rosas da Festa da Rosa dos próximos anos”.

 

A iniciativa persegue os obxectivos de potenciar a imaxe ‘Mos, A Rosa do Camiño’ e de fomentar a participación no Concurso de Rosas da Festa da Rosa dos próximos anos

 

Durante o reparto de rosais nas asociacións Oliver Weiss dálle aos presentes unha breve explicación da prantación e dos coidados necesarios durante os primeiros días para os rosais. Indicacións que se completarán nunha charla que el mesmo dará a finais deste mes no Pazo de Mos e na que explicará en profundidade as técnicas para o cultivo e coidado dos rosais e resolverá dudas ao respecto. A conferencia estará aberta á participación de todas as persoas que queiran coñecer mellor o fascinante mundo dos rosais e da súa flor, a rosa.
En total o Concello de Mos repartirá 300 rosais entre os usuarios dos 17 cursos que se imparten en diferentes asociacións mosenses. Ata o de agora o reparto realizouse en 7 destas asociacións.

Dende a administración local mosense decidiuse facerlle entrega dos exemplares de rosal aos participantes nos cursos de Tempo de Lecer “para premiar a súa implicación cos programas municipais e a súa participación no movemento asociativo, así como debido á relación coa xardinería dalgúns dos cursos impartidos nas asociacións entre os que se atopan os de disciplinas coma a poda, a arte floral.., etc.” declararon a rexedora local e a edil de Cultura.