A alcaldesa de Mos, Nidia Arévalo, e o concelleiro de Patrimonio, Camilo Augusto, visitaron esta semana os traballos de restauración xa iniciados do Cruceiro dos Cabaleiros, ubicado na parroquia de Mos en Pleno Camiño de Santiago Portugués ao seu paso polo municipio mosense.

Os representantes locais, Arévalo e Augusto, informaron de que a restauración do Cristo da Victoria, situado nos Cabaleiros, conta xa co sistema de andamiaxe necesario instalado e a restauradora e o seu equipo de técnicos teñen comezado os labores de restauración propiamente ditos. Ademais explicaron que outra das fases que incluía este proxecto, a de soterramento da liña eléctrica, xa foi tamén iniciada e atópase acometida a canalización necesaria para dito soterramento.

O Cristo da Victoria, nos Cabaleiros, está protexido por Patrimonio por datar de 1612. A primeira escritura na que figura o cruceiro é do ano 1673.

O proxecto de restauración, cun orzamento total de obra que ascende a 16.348,90 euros, consiste en eliminar líquenes e contras (mediante diferentes técnicas de limpeza e aplicación de biocidas), eliminar o encintado de cemento e policromía sintética actuáis, eliminación das intervencións pouco adecuadas como: o repintado, a colocación de valo metálico, a estrutura metálica para luces na parte superior e o amaño da contorna.

A restauración de todo o conxunto, coa eliminación de pintura, estrutura superior e pechado, ademais de cubrir con pedra a zona do primeiro chanzo, cambiar a liña que vai por encima, e as hornacinas para as velas, ten un orzamento aproximado duns 10.000 euros, ós que hai que sumarlles unha inversión duns 7.000 euros para a acometida do soterramento da liña eléctrica que afea o ben. En total adicaranse os preto de 17.000 euros arriba indicados á optimización do Cruceiro dos Cabaleiros.

Todos estes traballos quedarán rematados de cara ao vindeiro mes de maio.

O cruceiro, que está catalogado e protexido por ser Patrimonio Cultural de Galicia, data do ano de 1612. A súa medida total é de 5,80 metros de altura aproximadamente.  Atópase colocado nun cruce de camiños por onde transcorre o Camiño de Santiago Portugués e, neste sentido, Nidia Arévalo destacou que “ademais de que a restauración deste singular elemento patrimonial da parroquia de Mos era unha importante demanda veciñal, o interese por parte da administración local de rehabilitalo e mellorar o seu estado e aspecto ven dado tamén polo gran interese deste Concello na posta en valor do Camiño ó seu paso por Mos, xa que é un dos nosos principais e máis relevantes recursos turísticos, patrimoniais e históricos”, explicou a alcaldesa mosense.

Para a restauración deste cruceiro a Deputación de Pontevedra ven de conceder unha subvención de 10.851,55 euros.