O vicepresidente da Xunta de Galicia, Alfonso Rueda, asistiu este luns á inauguración da sede da Eurocidade Monçao-Salvaterra de Miño e destacou a súa importancia para que as dúas localidades desenvolvan proxectos en común que permitan afondar na importancia da cooperación transfronteiriza.

Rueda participou nun acto ao que asistiron o secretario de Estado das Comunidades Portuguesas do Goberno de Portugal, Jose Luis Carneiro; o alcalde de Salvaterra de Miño, Arturo Grandal, e o alcalde de Monçao, Augusto Domínguez.

Esta Eurocidade constituiría o terceiro organismo de cooperación local entre Galicia e Portugal despois das eurocidades de Chaves-Verín e de Tui-Valença. O edificio está situado en Monçao, no antigo posto da fronteira, e contará con persoal encargado de informar e de pór en valor todo aquelo que identifica aos dous pobos: o río, a cultura, a historia ou a gastronomía.

Ademais de dar información, o persoal estará centrado na realización de actividades e actos conxuntos entre os dous concellos. Así mesmo, traballará e presentará proxectos con vistas a candidaturas a fondos europeos co fin de revalorizar, optimizar e dar novos recursos aos máis de 30.000 veciños que conforman a Eurocidade.