A alcaldesa de Mos, Nidia Arévalo, e a concelleira mosense de Política Social, Sara Cebreiro, informaron hoxe da recente proposta de adxudicación do servizo de ludoteca tanto na nova de Louredo como na de San Rafael á empresa Activalede S.L., que foi aprobada na derradeira Xunta de Goberno Local.

O servizo de ludotecas municipais do Concello de Mos para usuarios de ata 12 anos escolarizados, adxudícase para a súa explotación durante dous anos prorrogables por outros dous.

O procedemento de adxudicación realizouse mediante tramitación ordinaria e polo procedemento aberto seguindo criterios con cuantificación dependente dun xuízo de valor tales coma plan de organización e animación, tarifas, promoción e comercial do servizo etc. e criterios avaliables de xeito automático tales coma a oferta económica; resultando adxudicataria a empresa que acadou maior puntuación.

Os seguintes trámites a seguir serán a adxudicación definitiva e a sinatura do contrato, polo que se estima que a nova empresa adxudicataria se atope prestando o servizo no prazo dun mes aproximadamente.

As representantes municipais, Arévalo e Cebreiro, destacaron hoxe a “importancia deste servizo, fundamental para a conciliación da vida familiar e laboral dos veciños e veciñas de Mos”.

“Coa gran extensión territorial que ten Mos é importante poder contar con dúas Ludotecas Municipais. A actividade da primeira Ludoteca Municipal de Mos, a de San Rafael en Pereiras, foi en ascenso progresivo e diversificándose ademais, xa que non só se imparten nela obradoiros e iniciativas infantís, senón tamén para adultos. Cómpre destacar ademais a importancia que as Ludotecas teñen no aspecto social, de relevancia capital”, explicaron a rexedora local e a edil de Política Social.

As obras de adaptación en ludoteca da antiga Escola Unitaria de Louredo, que comezaron a finais do pasado mes de marzo, están a piques de ser rematadas.