A Presidenta da Deputación de Pontevedra, Carmela Silva,  presentaba esta semana en rolda de prensa o novo programa DepoRuArte que achegará propostas de lecer e de cultura urbana a dez localidades da nosa provincia nos próximos meses para a mocidade. Este sábado comeza en Nigrán na praza do Concello entre as 17 e as vinte horas.

Silva recordou que esta iniciativa de ocio e lecer para os mozos e mozas naceu o ano pasado do servizo de Cohesión Social e Xuventude, que dirixe a deputada Digna Rivas,  co fin de ofrecer unha alternativa a mocidade da provincia e que contou con “vinte talleres en distintos concellos da provincia que comprendían música, cociña, deporte, arte urbana, vídeo e un longo etcétera”.

A Presidenta da Deputación subliñou que tras a experiencia do ano pasado DepoRuArte foi mellorado para ofrecer unha mellor alternativa para a mocidade pero sempre “cunha compoñente inclusiva para que os mozos e mozas con diversidade funcional tamén podan participar en todas as actividades”. Silva, de feito, destacou que algún dos monitores que acompañarán aos participantes conta con algunha diversidade funcional.

Este ano a oferta de DepoRuArte vai estar concentrada en novos obradoiros nunha mesma xornada entre as cinco e as oito horas da tarde que celebraranse en dez localidades da provincia ao longo dos próximos meses. De feito comezará por Nigrán, este mesmo sábado na praza do concello, e continuará en Marín o próximo día 24 de xuño. Outras localidades que acollerán os obradoiros serán A Estrada, Silleda, Caldas, Vilagarcía, Poio,  Mondariz, O Porriño e Tui.

Os obradoiros divídense nas iniciativas MusicArte, UrbanArte, CreArte, que ofrecen a mocidade os coñecementos básicos para a experiencia de creación de música, grafitis e a decoración artística. Calquera mozo ou moza maior de doce anos poderá achegarse ate estas localidades e anotarse para participar nestes talleres.

 

A Presidenta da Deputación anima á mocidade a participar coas súas propostas e iniciativas aos Premios da Xuventude

 

Así o MusicArte ofrece tres obradoiros distintos. O primeiro de Breakdance (coa aprendizaxe das técnicas deste estilo de baile urbano); Turntablism DJ (que é o movemento que realizan os DJ de Hip-Hop cos vinilos ate adiante e atrás para crear composicións sonoras); e o de Beatbox (que é a creación de música sexan ritmos ou melodías coa boca).  UrbanArte ofrece un obradoiro para a creación e elaboración de pinturas coa base dos Grafiti. E CreArte ofrece un obradoiro para a personalización de gorras mediante debuxos na súa parte frontal.

Precisamente, a Presidenta mostrou a súa satisfacción polo traballo desenvolvido pola deputada Digna Rivas á que felicitou polas iniciativas que desenvolve o seu departamento. “Como ben saben, unha das prioridades que nos marcamos ao comezo desta lexislatura polo novo goberno provincial,  foi poñer aos veciños e veciñas de toda a provincia no centro de todas as nosas políticas. Por elo, temos apostado fortemente polo servizo de Cohesión Social e Xuventude e ano a ano imos incrementando as partidas económicas do servizo. Para o 2017 Cohesión Social e Xuventude dispoñen dun orzamento de máis de 5,5 millóns de euros o que supón un 7,4 por cento máis que no 2016”. Todos estes datos e un resumo de todas as actividades do servizo foron presentadas por Carmela Silva nun vídeo que poderá ser visibilizado nas redes sociais  e na web da Deputación.

Por último, a Presidenta animou a mocidade da provincia a presentar as súas propostas e ideas aos primeiros Premios da Xuventude “xa que queda unha semana para que conclúa o prazo”.

Carmela Silva recordou que  estes premios están dirixidos a mozos e mozas da provincia de idades comprendidas entre os 16 e os 35 anos e as modalidades de participación son as de iniciativa social (dous premios) e iniciativa empresarial (outros dous premios), para ambos os casos con proxectos de proxección e impacto social que favorezan a igualdade; blogs (tres premios) que promovan a igualdade, a educación en valores, a formación, o asesoramento, as actividades de voluntariado, culturais e/ou deportivas dirixidas á mocidade; educación en valores (dous premios) para proxectos que persigan a consecución da non violencia en todos os ámbitos da vida persoal, familiar e social, así como a prevención do acoso escolar e o ciberacoso; traballo musical (tres premios) para persoas sen contratos discográficos vixentes; traballo literario breve (tres premios) e, por último, fotografía orixinal (tres premios).