Mostrado por primeira vez ao público no Salón do Automóbil de Xenebra de 2017, Ren é o primeiro superdeportivo de produción eléctrica do mundo co sistema TREV (Turbine-Recharging Electric Vehicle) patentado por Techrules. A innovadora tecnoloxía do seu sistema de propulsión, ofrece niveis sen precedentes de eficiencia e rendemento e un impacto ambiental extremadamente baixo.

A versión superior do Ren ten unha capacidade de batería de 25 kWh e ofrece unha potencia máxima de 960 kW (1.287 CV) cunha autonomía de 1.170 km con 80 litros de gasóleo (NEDC). O chasis foi deseñado polo construtor italiano L.M. Gianetti, socio de desenvolvemento e fabricación de Techrules.

O deseño modular enfocado ao máximo rendemento, permite configurar o coche cunha, dous ou tres cubertas de policarbonato, en función das necesidades do condutor. Cando se selecciona a configuración de tres ocupantes, os dous pasaxeiros sentan comodamente a ambos os dous lados do condutor, en posición semi-estirada, con acceso a pantallas táctiles despregables e un sistema de comunicación que utiliza altofalantes e micrófonos incorporados en cada un dos repousacabezas.

O atractivo do Ren reálzase co refinado habitáculo que ofrece exclusividade co uso dos materiais máis luxosos. A cabina do condutor e dos pasaxeiros emprega o coiro italiano máis fino (cuoio italiano e alcántara) cubrindo toda a superficie interior.

Para aumentar a sensación de luxo excepcional, os asentos termínanse nun exclusivo tecido producido pola empresa de roupa de alta costura PT (Pantaloni Torino). A súa textura a medida está deseñada para suxeitar aos ocupantes nos seus asentos e evitar o deslizamiento en curvas ou freadas.

A produción do Ren comezará con toda probabilidade en 2018, e xa chegaron os primeiros pedidos. Unha serie limitada de versións de circuíto será construída artesanalmente por L.M. Gianetti en Italia.