O PP denuncia o deterioro da estrada de Torneiros a Mosende, no Porriño

O Partido Popular denuncia "o grave deterioro que sofre a estrada provincial de Torneiros a Mosende, no Porriño". A voceira do grupo provincial do PP, Nidia Arévalo, percorreu esta estrada xunto co presidente local do Porriño, Alejandro Lorenzo, para comprobar “as condicións de abandono que sofre esta vía ante a pasividade do Bipartito da Deputación de Pontevedra”.

“Non se pode entender que co Parque de Maquinarias que ten a Deputación de Pontevedra, teñan as estradas nun estado tan lamentable, tan deterioradas e con tantas deficiencias”, criticou Arévalo. Así, recordou que o grupo provincial leva recorrida toda a provincia nestes dous anos para denunciar situacións coma esta en moitos dos seus concellos. “Que podemos esperar de un goberno Bipartito que nin sequera é capaz de manter en boas condicións as estradas da provincia”, engadiu.

 

Nidia Arévalo critica que non se entende que poidan ter as estradas neste estado lamentable tendo en conta o Parque de Maquinarias do que dispoñen

 

O presidente local do partido, Alejandro Lorenzo, sinalou que esta estrada precisa de unha actuación urxente. Así, os populares urxen o cambio de asfaltado, desbroce das cunetas, pintado da estrada, melloras na iluminación e sinalización de pasos de peóns. “Esta estrada está instransitable para os peóns”, criticou, ao tempo que recordou que por ela camiñan a diario moitos nenos que se expoñen a situacións de risco pola pouca visibilidade nas cunetas e pola falta de pasos de peóns. Ademais, apuntou que a escasa iluminación provoca que pola noite a visibilidade sexa practicamente nula.

Alejandro Lorenzo cuestiona, tamén, o papel do concello no estado das estradas provinciais do Porriño. “Non se pode consentir esta desidia nin pasotismo do Bipartito da Deputación, pero tamén nos preguntamos que papel xoga aquí o Goberno local. Nin unha soa reclamación, e co seu silencio están sendo cómplices desta situación”. Nesta liña, recorda que o deber do Goberno local é defender os intereses dos veciños do Porriño e, neste caso, está clara cal debería ser a súa postura. Por iso, os populares presentarán unha moción no pleno municipal para reclamar á Deputación unha actuación urxente nesta estrada e, confían, sexa aprobada por maioría.