A corporación do Porriño rexeita a decisión da Xunta de retirar a ESO do CEIP da Ribeira

Instar á Concellería de Educación a que desista da súa intención de deixar de impartir o curso de Ensino Secundario Obrigatorio (ESO) no Centro de Público de Integración (CEIP) da Ribeira, situado en Torneiros.

Esta foi a resolución adoptada polo Pleno do Concello, a proposta do Grupo Municipal de EU-SON, e no mesmo sentido que a que defenderá a concelleira de Educación, Lourdes Moure, en nome do Grupo Municipal Socialista.
Un acordo transaccional permitiu que a Corporación dese o seu apoio á moción presentada polo concelleiro Pedro Ocampo quen rexeitou este peche que, como estiveron dacordo os grupos socialista, de UDDL, BNG e EU-SON, “deixaría o CEIP da Ribeira coma un centro de Primaria” e supón, ademais un ataque á Educación pública, gratuíta e de calidade.

Coma indicara a concelleira de Educación,o CPI Da Ribeira é o único centro público de integración do Porriño, no que o 35% dos seus alumnos son de etnia xitana, “conseguíndose ao longo dos anos que a integración do colectivo na vida e actividades do concello, a eliminación do absentismo escolar, a participación do alumnado, tanto nenas como nenos, nas actividades extra escolares, “que pasou do 3% en 2009 ao 80% este mesmo ano”.

Lourdes Moure alertou de que o peche do curso da ESO do CPI Ribeira “suporá un retroceso no bo camiño emprendido pola comunidade educativa que permitiu que as rapazas e rapaces de etnia xitana non so rematen Secundaria senón que segan cos seus estudos de Bacharelato, conseguindo moitas das metas que se propuxeran e que poderían sufrir un dano incalculable se, finalmente, se prescinde do Ensino Secundario Obrigatorio”.