A Consellería de Infraestruturas e Vivenda, a través da Axencia Galega de Infraestruturas (AXI), destinará preto de 60.000 euros á reposición das beirarrúas da travesía da estrada autonómica PO-411 en Soutelo, no concello de Salceda, e concretamente entre o p.q. 1+500 e o 1+880.  

Esta actuación ten un prazo de execución de dous meses, e levarase a cabo neste mesmo verán. Así mesmo, posto que se trata dunhas obras de reposición de beirarrúas, non son necesarias expropiacións, e realizaranse en terreos de Dominio Público adscritos a Axencia Galega de Infraestruturas.

 

As obras consistirán na demolición da beirarrúa existente, a instalación dun novo bordo e a execución de novas beirarrúas de formigón

 

O director da Axencia Galega de Infraestruturas (AXI), Francisco Menéndez, acompañado polo delegado territorial da Xunta en Vigo, Ignacio López-Chaves, explicou a semana pasada á Asociación de Comerciantes Tabernanova de Soutelo a actuación programada polo Goberno galego no termo municipal de Salceda de Caselas. O obxectivo é a mellora do estado das beirarrúas no devandito tramo de cara a recuperar a funcionalidade das beirarrúas, xa moi antigas e deterioradas polo paso do tempo, así como a mellorar a imaxe dunha travesía que constitúe a zona comercial de Soutelo.

As obras consistirán na demolición da beirarrúa existente, a instalación dun novo bordo e a execución de novas beirarrúas de formigón. Trátase dunha solución que permitirá dotar a esta travesía dunhas beirarrúas axeitadas para o tránsito das persoas ata que se leve a cabo a instalación planificada dunha nova rede de saneamento, que obrigará a unha renovación máis completa dos servizos e beirarrúas.