A Consellería do Medio Rural leva construído nos últimos cinco anos un total de 412 novos puntos de auga para a loita contra os incendios forestais, co obxectivo de reforzar e mellorar estas instalacións que son claves no traballo dos medios terrestres e aéreos do dispositivo antiincendios de Galicia.

En total, a nosa comunidade ten repartidos 5.919 depósitos polos 19 distritos forestais. Así, na provincia da Coruña están localizados 1.696 puntos, na de Lugo 1.496, Ourense ten 1.447 e Pontevedra 1.274. Desta forma queda cuberta toda a xeografía galega para en caso preciso poder contar con diversos puntos de recollida que están ubicados en zonas estratéxicas para a defensa dos núcleos de poboación e das masas forestais.

Ademais hai que matizar que destes preto de 6.000 depósitos, 789 son só para o uso de medios aéreos. A provincia que máis ten é a de Ourense, seguida de Lugo, A Coruña e  finalmente Pontevedra. Son estanques moito máis grandes para que os helicópteros, e avións de carga en terra, poidan encher os seus dispositivos.

Liña de axudas
O departamento que dirixe Ángeles Vázquez ten tamén unha liña de axudas para os montes veciñais en man común e sociedades de fomento forestal para a prevención dos danos causados nos montes por incendios, desastres naturais e catástrofes, dotada este ano con 4 millóns de euros.

Estas axudas engloban dúas liñas de subvención. Por unha parte, financia o control selectivo do combustible en áreas cortalumes, faixas auxiliares de pista, rexenerado forestal natural e a roza de penetración, rareo e eliminación de restos das entrefaixas de masas forestais. A segunda liña de subvención financia precisamente a construción de puntos de auga.