O Parque Comarcal do Morrazo do Consorcio Provincial de Pontevedra para a Prestación do Servizo contra Incendios e de Salvamento, adscrito á Deputación de Pontevedra, interveu esta madrugada na extinción dun lume orixinado nun edificio de vivendas de cinco plantas da localidade de Marín.

O Parque recibiu o aviso do incendio ás 4:46 horas da madrugada e ata o lugar se desprazou a dotación de garda cun vehículo de primeira intervención e o auto-escaleira. Unha vez no lugar, o equipo contra incendios e de salvamento verificou que se desaloxara a todas as persoas da vivenda incendiada, entre elas un bebé, e ao resto de veciñas e veciños.

O persoal do Parque, adscrito á Deputación de Pontevedra, foi quen de localizar o foco e de extinguir o lume e traballou na ventilación da vivenda para poder permitir o realoxamento dos veciños e veciñas unha vez a medición de monóxido de carbono foi apta para poder realizar esta tarefa. A intervención, deste xeito, rematou ás 7:26 horas da mañá.

Un total de catro veciñas e veciños mailo bebé foron trasladados e trasladadas polo servizo de emerxencias 061 ao centro de saúde e todos e todas foron dadas de alta trala súa observación por parte do persoal médico.