O Club de Xadrez Mos xunto co Concello de Mos organizan o II Torneo de Xadrez Concello de Mos que terá lugar o sábado 2 de setembro no Centro Dotacional do Medio Rural de Torroso. A competición, pertencente ao Circuíto Galego de Xadrez e ao XII Circuíto de Promoción do Xadrez 2017, dará comezo ás 11.00 horas da mañá e clausurarase ás 20.00 horas da tarde.

O Torneo disputarase por categorías que se clasificarán en categorías por idades e categoría absoluta.
Nesta competición poden inscribirse, de xeito totalmente gratuíto, tanto clubes coma xogadores particulares federados de calquera procedencia. O ano pasado, na primeira edición do torneo, participaron preto de 200 persoas integrantes de clubes procedentes de toda Galicia e Portugal. As inscricións poden formalizarse dende xa no enderezo de correo electrónico clubxadrezmos@gmail.com ou telefónicamente chamando ao número 618 873 541.

Os obxectivos desta iniciativa son a promoción do xadrez en Mos e a continuidade do labor de anos nesta disciplina deportiva. E é que o Club Xadrez Mos fundouse en 2014 e cumple 4 anos de duro traballo a prol do xadrez no municipio.

Tanto dende o Club Xadrez Mos como dende a administración local mosense espérase lograr alcanzar o número de inscritos da pasada edición do Torneo de Xadrez Concello de Mos ou incluso superalos, a ser posible; por iso animan a tódolos amantes do xadrez a participar no mesmo.