O Deputado de Promoción Turística, Fomento de Industrias Turísticas e Artesanía e Turismo Rías Baixas, Santos Héctor, recibiu esta semana no Pazo Provincial a un grupo estudantes chineses do IESIDE (Instituto de Educación Superior Intercontinental de la Empresa), que dende o pasado 10 de xullo estiveron en Galicia cursando o Diploma Avanzado en Relacións Internacionais (DARI) e realizando un proxecto empresarial para diferentes empresas punteiras da comunidade. A comitiva estaba composta por catro rapazas e dous rapaces de nacionalidade chinesa e outros tres estudantes, dous de España e unha de Venezuela, que traballaron co grupo durante a súa estancia.

Héctor Santos valorou moi positivamente experiencias de intercambio cultural como este e sinalou que “a información pode buscarse en Google” pero que estes encontros favorecen a creación de “vínculos e experiencias que só se acadan en persoa”. Ademais, lembrou a importancia que teñen as relacións e investimentos chineses na provincia de Pontevedra e sinalou que “a partir de agora eles e elas serán embaixadores e embaixadoras da nosa terra no seu país”, engadiu o deputado.

Durante a súa visita as e os estudantes puideron coñecer de primeira man o funcionamento da institución provincial e trasladáronlle ao deputado as súas impresións sobre a nosa cultura, da que destacaron a súa sorpresa porque unha muller, Carmela Silva, presidira por primeira vez a Deputación de Pontevedra e a capacidade da cidade de compatibilizar “as festas coa profesionalidade das empresas”, algo que a todos e todas lles gustou especialmente. Pola súa banda, o deputado Héctor Santos felicitounos polo traballo realizado durante este mes e destacou alto nivel de español que demostraron ter a pesar de levar estudando esta lingua dende tan só hai sete meses.

Esta é a segunda edición do Diploma Avanzado de Relacións Internacionais posto en marcha por IESIDE que combina sesións lectivas con traballos en equipo, conferencias, visitas a empresas e actividades de aprendizaxe fóra da aula. Nesta ocasión o alumnado procedente da Universidade de Economía e Comercio Internacional de Beijing, líder neste ámbito en China, tivo a oportunidade de coñecer sectores primordiais da economía galega como a pesca e do téxtil. Tamén o turismo foi unha área que se traballou na edición anterior, na que ademais dúas alumnas chinesas realizaron as súas prácticas no servizo de Turismo Rías Baixas da Deputación.