Dende o Concello de Salceda de Caselas explican nun comunicado que “por terceiro día consecutivo, Monbús pretendía enviar os nenos/as do CEP Altamira da parroquia de Picoña e parte de San Xurxo nun microbús con capacidade insuficiente para o alumnado. Tanto o luns como o martes os cativos viaxaron sentados de tres en tres en cada dous asentos, feito que pretendía volver repetirse hoxe mércores. Sen embargo, dende o Concello xa se tiña avisada a Policía Local para que non permitise a saída do autobús nesas condicións, e o mesmo fixeron un grupo de nais da parroquia, así como compoñentes da directiva da ANPA e a mesma Concelleira de Ensino Tere Pérez, que se presentaron na saída do colexio dispostas a defender a seguridade dos seus fillos e fillas”.

Ante esta situación, a empresa optou por facer unha doble viaxe, facendo a primeira saída cos nenos das paradas de Outeiro e Condide. Mentres tanto, o resto de cativos agardaron no colexio baixo o coidado de persoal docente do centro, que se encargou da vixianza dos mesmos ata a chegada da segunda viaxe que os levou á súa casa.

Tere Pérez, Concelleira de Ensino explicaba que “consideramos de extrema gravidade o que estivo acontecendo estes dous días, e non imos consentir que se repitan este tipo de situacións. A empresa terá que mandar un autobús con capacidade suficiente para atender o alumnado de cada unha das rutas, pois tampouco é de recibo deixar a case unha vintena de nenos e nenas agardando no colexio a que veña o autobús de volta a recollelos”.

Descontento co transporte

Onte mesmo o Salón de Plenos do Concello de Salceda de Caselas acolleu a xuntanza convocada polo Equipo de Goberno cos representantes das asociacións de veciños, xubilados, ANPAS e outras persoas afectadas polos cambios producidos no sistema de transporte público.

O Alcalde Marcos Besada, acompañado polas Concelleiras Tere Pérez e Carla Pérez, fixo unha exposición da situación actual, atopándose con un absoluto descoñecemento por parte dos colectivos. Así mesmo, o Concello deu conta dos pasos dados ante a Xunta para defender os intereses dos veciños e veciñas de Salceda ante o que consideran un atropelo nunca antes visto no que a mobilidade se refire, con numerosos escritos enviados á Dirección Xeral de Mobilidade solicitando a reposición das liñas retiradas así como o aumento de frecuencias das mesmas. Na reunión cos diferentes colectivos acordouse iniciar acción conxuntas na defensa do servizo de transporte público en Salceda, que se irán materializando nos vindeiros días.