Desde Erguer, Estudantes da Galiza, avalían "moi positivamente o grande éxito das concentracións convocadas para esta mañá ás 12 en todos os centros de ensino. Decenas de facultades e institutos de todo país se sumaron ao parón de aulas e centos de estudantes reclamaron a asunción de responsabilidades políticas por parte da Xunta de Galiza e a mudanza do noso modelo forestal".

Según explican dende este colectivo "os montes abandonados, os monocultivos de eucalipto, a prórroga concedida a ENCE na Ría de Pontevedra ou as autorizacións para construír en terreo queimado son as verdadeiras causas que explican a catástrofe ecolóxica de onte, a meirande no noso país desde o Prestige. É unha tremenda irresponsabilidade política que Feijóo se dedique a botar balóns fóra e que sigamos a falar de 'pirómanos', cando os verdadeiros incendiarios son as grandes empresas con intereses en especular co terreo dos nosos montes".

A responsábel de organización de Erguer, Iria Figueroa, afirmou esta mañá ao remate das concentracións que “se demostra, coa extensa resposta popular do estudantado, que o pobo galego é quen de tecer solidariedade e artellar reivindicacións con rapidez, fronte á inoperancia e incompetencia da Xunta de Galiza”. “Xa onte o observamos co grande operativo veciñal para apagar os lumes e coas redes de axuda para as persoas que foron desaloxadas dos seus fogares, vímolo de novo coas concentracións do estudantado desta mañá e non nos cabe dúbida de que volveremos velo nas concentracións convocadas para hoxe ás 20h. en múltiples vilas galegas” –engadiu.