O vindeiro sábado, 28 de outubro, está prevista a inauguración do novo espazo engadido ao Centro Dotacional do medio Rural de Torroso.

As obras, que contaron cun orzamento de 825.000 euros, suporán a ampliación da súa capacidade en 500 metros cadrados máis.

En total sumarán cinco novas salas incluída unha sala de 67 metros cadrados para o Centro de Día e tamén un espazo polivalente de 150 metros cadrados máis.

Centro de Día

A nova ampliación contará con espazos con visión de converterse nun Centro de Día para a terceira idade, no que realizaranse actividades encamiñadas á mellora das condicións psicosociais dos maiores.

Deste xeito as persoas maiores non dependentes “poderán pasar as mañás de luns a venres realizando actividades que  mellorarán as súas capacidades, cognitivas, motoras e sociais” segundo explica nun comunicado interno destinado aos vecinos a Comunidade de Montes de Torroso.

Entre as actividades propostas destacan “exercicios de memoria, taller de lectoescritura, traballo de psicomotricidade fina e grosa, actividades de ocio en equipo” entre outras.

Os interesados en participar nestas actividades xa poden poñerse en contacto coa Comunidade de Montes de Torroso na oficina ubicada no Centro Dotacional.