Onte celebrouse no salón de actos da Axencia de Colocación de Mos a presentación do Obradoiro de Emprego “Mos Rehabilita”, na que estiveron presentes Ignacio López-Chaves, delegado territorial da Xunta de Galicia en Vigo, Ignacio Rial, xefe territorial da Consellería de Economía, Emprego e Industria, Nidia Arévalo, alcaldesa de Mos, Óscar Soto, concelleiro de Promoción Económica, Emprego e Novas Tecnoloxías, demais membros do equipo de goberno local e alumnos/as-traballadores/as do Obradoiro e os integrantes do equipo de directivos e docentes do mesmo.

Para a realización deste Obradoiro a consellería de Economía, Emprego e Industria da Xunta de Galicia concedeulle ao Concello de Mos unha subvención de 279.959,00 euros.

O Obradoiro de Emprego “Mos Rehabilita” está integrado por 5 membros do equipo directivo/docente, 12 alumnos-traballadores da especialidade construcción con novos materiais (dos cales 2 son mulleres) e 8 alumnos-traballadores da especialidade fabricación mecánica/soldadura (na que hai 1 muller), resultando un total de 20 alumnos-traballadores e 25 integrantes incluíndo ao director e ao profesorado.

Durante os nove meses de duración do Obradoiro, que comezou o pasado 11 de outubro e rematará o 10 de xullo de 2018, realizaranse obras e servizos de acabados de construción con novos materiais e fabricación mecánica.

Os acabados de construción con novos materiais que se farán son a rehabilitación do edificio municipal do departamento de Vías e Obras mellorando o aspecto exterior de fachadas e cubertas, a impermeabilización e a eficiencia enerxética; a rehabilitación e posta en marcha dos muíños da Barxa e Porteliña  e a recuperación integral da cuberta e da fachada do Muíño do Cepo; así como a restauración ou reparación de elementos deteriorados de fontes e lavadoiros (do amplo listado que figura  como patrimonio do Concello) para voltar á súa imaxe orixinal.

E por outra banda na especialidade de fabricación mecánica acometeranse barandillas interiores e exteriores para o edificio de Vías e Obras, construiranse os elementos necesarios para por en marcha os muíños, mellorarase a seguridade nos colexios de Atín e Pena de Francia, mellorarase a cuberta do edificio do Servizo Municipal de Emerxencias, crearase un espazo “street work out” e instalaranse paneis informativos mediante chapas metálicas e ancoraxes  sobre postes metálicos  para soporte de textos.