A alcaldesa de Mos, Nidia Arévalo, a concelleira de Persoal, Sara Cebreiro, e demais membros do equipo de goberno local convocaron onte a unha reunión urxente que se celebrou á última hora da mañá no salón de actos da Axencia de Colocación mosense a todo o persoal traballador do Concello de Mos para comunicarlles a sentencia do Xulgado Contencioso Administrativo número 2 de Pontevedra sobre o recurso presentado polo grupo municipal GañaMos sobre a modificación da Relación de Postos de Traballo, RPT, aprobada definitivamente en sesión plenaria de 25 de abril de 2016.

Dito recurso foi estimado polo Xulgado declarando a modificación da RPT nula de pleno dereito, o que implica a "inminente derogación de tódalas melloras laborais acadadas na mesma grazas á devandita modificación (xa que ningún traballador se viu afectado nin agraviado pola modificación, todos/as eles/as ou mantiveron a súa situación ou resultaron beneficiados). Esta sentencia afecta a máis da metade da plantilla municipal mosense, tanto económicamente como no que respecta ao recoñecemento de funcións departamentais" segundo explican dende o Concello.

A este respecto a rexedora local, Nidia Arévalo, considera que “é moi triste que a práctica totalidade dos traballadores/as municipais se vexan seriamente perxudicados laboralmente polo afán de GañaMos de defenestrarme políticamente e, nesa obsesión de querer botarme da Alcaldía, non teñen miramentos en levarse por diante a quen sexa necesario”. “Os verdadeiramente perxudicados con esta sentencia son os traballadores e con esta actuación de GañaMos o que veñen a demostrar unha vez máis e a súa falta de sensibilidade e as ansias de medrar políticamente a calquera prezo”, declarou Arévalo.

“Cómpre ademais destacar que o recurso non naceu de ningún traballador/a nin de ningún sindicato que decidisen emprender accións legais contra a RPT, senón do grupo político GañaMos que, vala a redundancia, presentouno única e exclusivamente por fins políticos e non por interese polos traballadores/as”, insiste a alcaldesa.

A decisión do goberno local é a de acatar a sentencia e anular de inmediado os cambios e modificacións aprobadas na última RPT, así como presentar recurso ante o Contencioso "para evitar que os traballadores/as afectados/as teñan que devolver a mellora salarial que viña repercutindo nas súas respectivas nóminas dende a aprobación da modificación da RPT". Ademais o Concello de Mos aseguran que "leva xa dende fai un ano traballando nunha nova mellora da Relación de Postos de Traballo e actualmente unha empresa está a realizar os labores necesarios para a nova optimización". A rexedora Nidia Arévalo anunciou a este respecto que "espera que o vindeiro mes de xaneiro poida estar aprobada a devandita modificación".

Esta empresa que se encargará da redacción da mesma mantivo xa reunións con todos os traballadores e traballadoras para sondear as necesidades e opinións respecto dos diferentes departamentos municipais.
Tras o verán xa se celebrou unha reunión cos sindicatos sobre esta nova mellora do documento da RPT do Concello de Mos.