A Responsábel de Organización de Erguer. Estudantes da Galiza, Iria Figueroa, afirmou que “foi unha folga amplamente secundada tanto no ensino medio coma no universitario, na que Erguer encheu con mobilizacións as rúas de trece cidades e vilas galegas”. A isto engadiu que “os resultados do referendo realizado o mes pasado por Erguer, no que un 94% das case 8 000 estudantes que participaron en 70 centros de ensino do país votaron a favor dunha Lei Galega de Educación, véñense de referendar nas rúas mediante esta folga”.

O seguimento da folga no ensino medio foi do 90%, e na universidade estivo tamén preto desta cifra. Nas trece mobilizacións convocadas por Erguer saíron á rúa 4000 persoas, e Figueroa tamén afirmou que “baleiramos as aulas e enchemos as rúas de múltiples ciudades e vilas do país, con mobilizacións que demostran que o estudantado quere ser partícipe da elaboración dun modelo educativo alternativo que sexa verdadeiramente pedagóxico, que aposte pola normalización do noso idioma, que eduque en igualdade, que realmente nos forme e desenvolva a nosa capacidade crítica e no que poidamos aprender a realidade propia do noso país”.