O Concello de Mos iniciará antes de final de ano as obras de acometida do novo parque da Pesqueira, á beira do río Louro, que fóra anunciado o pasado mes de setembro pola alcaldesa de Mos, Nidia Arévalo, e polo concelleiro de Patrimonio, Camilo Augusto, xa que foi necesaria a compra de terreos a particulares para poder dispoñer do espazo necesario.

O proxecto desta área de lecer na parroquia de Mos consta de tres fases e a que empezará a construirse antes de que remate o presente 2017 é a primeira fase, para a que a rexedora local logrou o compromiso de apoio económico por parte da consellería de Medio Ambiente e Ordenación do Territorio da Xunta de Galicia que dirixe a conselleira Beatriz Mato.

O proxecto íntegro, incluídas as tres fases dentro das cales se contempla a instalación dun Parque da Auga, está valorado en 200.000 euros. Pola súa banda esta primeira fase, de acometida inminente, ten un orzamento de 60.000 euros.

A actuación proposta para a primeira fase entra dentro dos supostos de interese público porque xustificase a necesidade de dotar de instalación de recreo unhas parcelas na zona da Pesqueira, xunto o Paseo do Louro, para dedicar a zona para esparcemento público para as persoas e instalación de parque de xogos en diferentes fases.

Resulta idónea a instalación porque as parcelas son colindantes co paseo do Louro o que supón unha vantaxe de excelente instalación como área de lecer dunha zona moi transitada.

Resulta interesante e necesaria a actuación polos seguintes motivos: a parcela municipal que se pretende actuar co presente proxecto está nun ámbito moi transitado polos veciños e supón unha actuación de recuperación ambiental e posta en valor, na actuación promóvese a recuperación ambiental centrándose na instalación dun parque con temática de esparcemento e xogo dos nenos, unha vez creado o parque nun futuro realizaranse actividades no entorno e a proposta encaixa ambientalmente co entorno e pon en valor a parcela municipal.

As obras consistirán na adecuación do terreo para obter as sub-bases necesarias para garanti-la estabilidade do firme. Para o cal é necesario o desbroce e nivelación da superficie afectada (12x20m), así como o aporte de xabre compactado. Posteriormente procederase a instalación dos elementos de xogo que comporán ó parque infantil, sendo o reto principal no deseño desta área a temática do esparcemento. En aras de acadar o devandito obxectivo instalaranse diversos elementos de xogo tales como un pórtico de columpio pendular, equipo combinado de trepas e xogos de muelle para ir de pé.

Tamén se contempla á hora de deseñar a área de xogos a inclusión de tódolos nenos, tendo en conta ás posible minusvalías que poidan sufrir, conseguindo deste xeito que tódolos nenos se integren totalmente no xogo e que poidan acceder facilmente ás instalacións, tanto os nenos como os pais ou acompañantes.

Nesta primeira fase realizarase o acondicionamento da superficie amortecedora de impactos ca instalación de céspede artificial en toda a superficie. E por último a instalación do cartel informativo e dun valo de madeira tratada en todo o perímetro.

Toda a instalación do parque terá as medidas de seguridade e saúde segundo a normativa vixente así como o respeto ao medio ambiente.

Terreos

O pasado 28 de setembro o Concello de Mos asinou a adquisición de 4.000 metros cadrados de terreos para a realización do novo parque na Pesqueira (parroquia de Mos) integrado no Sendeiro Ecolóxico do Río Louro e que incluirá diversas áreas de xogo para distintas idades, zonas de recreo e lecer, e un Parque da Auga.

O acto de sinatura formalizouse cos propietarios dos terreos adquiridos pola administración local.

O novo parque agrupará un Parque da Auga, un parque infantil (primeira fase que vai comezar próximamente), elementos biosaudables para adultos e unha zona de esparcemento e lecer que inclúa merendeiro con mesas, bancos, arboleda, etc.

A idea de incluír un novo Parque de Auga surxiu da enorme afluencia e o gran éxito que ten o xa existente Parque da Auga de Sanguiñeda. “Agora con este novo proxecto crearemos un Parque da Auga a maiores no outro extremo do municipio e nunha zona, como é o Paseo do Louro, enormemente transitada e concorrida pola veciñanza mosense, tanto para facer deporte como para pasear ou compartir o tempo de lecer cos máis cativos das familias”, declararon os representantes municipais Arévalo e Augusto.

A alcaldesa e o edil de Patrimonio consideran que “con este novo parque lograrase que o Paseo do Louro continúe crecendo en número de visitas e visitantes –xa que é un dos principais atractivos naturais do municipio, sendo xa unha zona moi transitada e cunha gran demanda- ao incluír un atractivo maior: un espazo que aglutinará zonas de ocio para todas as idades e onde poderán divertirse xuntos avós/as con netos/as, pais/nais con fillos/as, etc.” E é que o actual parque da Pesqueira, situado tamén xunto ao paseo pero do outro lado da estrada, conta só con elementos infantís e debido á gran afluencia diaria de familias quédase xa pequeno.