A Xunta investiu máis de 239.400 euros en dúas actuacións de mellora das infraestruturas no polígono industrial do Rebullón. As axudas destináronse a intervencións en saneamento e á mellora do pavimento da vía principal de acceso ao parque empresarial mosense.

Rematadas as actuacións o representante do Goberno galego na área territorial, Ignacio López-Chaves, desprazouse esta semana ata o municipio pontevedrés para supervisar de primeira man o estado das execucións. Na visita estivo acompañado pola alcaldesa da localidade, Nidia Arévalo, e o xefe territorial da Consellería de Economía, Emprego e Industria, Ignacio Rial, así como outros membros do goberno municipal e empresarios asentados no polígono.

Esta actuación enmárcanse no Plan de captación de investimentos. A Consellería de Economía, Emprego e Industria aprobou este ano apoios por preto de 4,2 millóns de euros para os concellos galegos destinados a un total de 73 proxectos en 59 parques empresariais da Comunidade dos que 20 corresponden a provincia de Pontevedra e 7 concretamente a área de influencia de Vigo.

 

O delegado territorial, Ignacio López-Chaves, xunto á alcaldesa de Mos, Nidia Arévalo, e o xefe territorial da Consellería de Industria visitaron hoxe as actuacións

 

O obxectivo desta acción é o de mellorar o servizo que se presta ás compañías xa instaladas, contribuíndo ademais ao impulso da súa competitividade e á atracción de novos investimentos con capacidade para xerar riqueza e emprego cara aos municipios.

Neste senso, as axudas concedidas acadan o 80% do custo subvencionable, que se incrementa ata un 95% no caso de agrupacións ou fusións de concellos. As actuacións oriéntanse á mellora das infraestruturas viarias, á dotación de servizos centralizados de xeración e subministración de enerxía de cara ao aforro e a eficiencia no gasto enerxético, depuración de augas, xestión de residuos e instalacións de sistemas de seguridade e vixilancia.