O vicepresidente da Xunta, Alfonso Rueda, acompañado do delegado territorial da Xunta en Pontevedra, José Manuel Cores Tourís, fixo entrega de diverso equipamento de emerxencias a 16 concellos da provincia de Pontevedra, mediante o cal se segue reforzando a xestión das emerxencias na nosa comunidade.

Ao abeiro das axudas da Vicepresidencia para equipamentos de emerxencias, en réxime de concorrencia competitiva, a concellos de menos de 50.000 habitantes, mancomunidades ou agrupacións de concellos galegos, grazas ao programa Operativo Feder-Galicia 2014-2020, foron adquiridos  7 remolques de emerxencias, 2 baúis de salvamento e rescate e 1 equipo de excarceración cun investimento de máis de 166.000 euros.

 

Nos dous últimos anos, a Xunta destinou máis de 8 millóns de euros en equipamento de emerxencias cedido aos concellos galegos

 

Foron entregados 7  Remolques de emerxencias para os concellos de Caldas de Reis, Cuntis, Poio, O Porriño, Portas, Redondela e  Agrupación de concellos de A Lama, Covelo, Fornelo de Montes, Mondariz, Mondariz Balneario; 2 Baúis de salvamento con diverso material de salvamento e ademais padiola de rescate, taboleiro espiñal e maletín de osixenoterapia, para os concellos de Pontecesures e Vilagarcía de Arousa; e 1 equipo de excarceración para a Mancomunidade de Val Miñor.

Rueda gabou a labor altruísta dos voluntarios, que contribúen a ofrecer un mellor servizo aos cidadáns e a dotalos dunha maior seguridade, complementando a labor que levan a cabo outros servizos profesionais de emerxencias coma bombeiros ou GES, polo que o Goberno galego nos dous últimos anos levou a cabo un importante investimento en medios materiais para as Agrupacións, que supera os 8 millóns de euros en equipamento cedido aos concellos galegos.