O conselleiro de Economía, Emprego e Industria, Francisco Conde, participou esta semana en Santiago na entrega dos I Premios Chemists por our future, que impulsan as empresas Mestrelab, da man de Carlos Cobas, e AMSlab, por parte de Manuel Lolo, cos que se galardoan os expedientes máis brillantes da Facultade de Química.

Conde, tras felicitar aos estudantes premiados e aos promotores desta iniciativa, destacou a importancia da transferencia do talento ao tecido empresarial para que a investigación científica poida ter un maior impacto na industria. Para iso, apuntou que canto máis estreita sexa a relación entre universidade e empresa máis sentido cobrará o termo de investigación aplicada. Conde indicou que a industria precisa de talento e coñecemento para que as empresas poidan incrementar a súa competitividade apostando, polo tanto, por unha maior conexión entre o mundo académico e o empresarial. Ao respecto, destacou a contribución destes premios a este reto, xa que dan a posibilidade de que o gañador poida realizar prácticas nunha das dúas empresas, ao tempo que lembrou a primeira incubadora galega de novos fármacos na que a Xunta colabora coa empresa Janssen e a Fundación Kaertor, que depende da Universidade de Santiago (USC).

 

Sinala que a industria precisa innovación e coñecemento para incrementar a súa competitividade apostando para lograr este obxectivo por unha maior conexión entre o mundo académico e o empresarial

 

En palabras do conselleiro, é fundamental que a iniciativa privada identifique que habilidades e coñecementos demanda o mercado laboral e que a universidade e os centros de formación saiban dar a resposta axeitada adaptando a oferta de titulacións á realidade actual. Neste senso, o titular de Economía apuntou que a Xunta traballa para adaptar a formación para o emprego aos perfís profesionais que están demandando na actualidade as empresas, ao tempo que resaltou a aposta da Xunta pola innovación e o talento a través da Estratexia de Impulso á Biotecnoloxía coa que se levan mobilizados 52 millóns de euros.

Neste eido, resaltan tamén dous programas (Oportunius e Principia) para a contratación de ata 300 tecnológos en empresas ou a iniciativa Conecta Peme que na súa última edición apoiou 14 proxectos do sector biotecnolóxico, un ámbito que en Galicia está crecendo o dobre que a media nacional, sendo o terceiro que máis medrou en toda España por detrás de País Vasco e Cataluña.

Para rematar, Conde ratificou a aposta da Xunta pola innovación, polo valor engadido e pola xuventude, habilidades que hoxe tamén se recoñeceron con estes galardóns cos que se premian aos tres mellores alumnos que empezan os seus estudos e aos tres máis destacados que finalizan a súa carreira.