Beatriz Gómez, que representará este ano ó Recanto do Miño no popular programa Luar da televisión de Galicia e baixo o nome artístico de ‘iAlma’, cantará o vindeiro venres día 22 de Decembro.

A porriñesa, veciña de Carracido, é coñecida na comarca pola súa vinculación coa  vida cultural e musical da contorna. Compaxina a dirección das corais “O son dos Cantares” de Tameiga, Mos e “ A Forna” de Budiño, coa dirección de “Emocionarte, escola de artistas”.

A vinculación co seu recanto tamén ven da man da música, o ter cursado estudios no Conservatorio Reveriano Soutullo de Ponteareas e sendo membro de diferentes agrupacións musicais da comarca.

Nesta ocasión interpretará a coñecida canción “ A Bamba”, peza tradicional mexicana que foi popularizada no ano 1958 por Ritchie Valens. Con ela tentará conseguir o pase á terceira fase que, como cada ano, dependerá da puntuación do xurado (composto por Tania Fuegho, Manuel de Andrade e o artista invitado da noite) e a votación do público mediante chamada telefónica. Para apoiar a iAlma poderán chamar 5 veces por liña ó número que aparecerá en pantalla despois da súa actuación.

Esta será a segunda vez que pise o escenario de Luar dentro do concurso logo de estrearse, o pasado mes de novembro, coa canción “Torre de Area” de Marifé de Triana.