Esta semana a alcaldesa de Mos, Nidia Arévalo, a concelleira mosense de Política Social, Sara Cebreiro, e o presidente de AFAGA (Asociación de Familiares de Enfermos de Alzheimer e outras Demencias de Galicia), Juan Carlos Rodríguez Bernárdez, reuníronse co conselleiro de Política Social da Xunta de Galicia, José Manuel Rey Varela, e o xerente do Consorcio Galego de Igualdade e Benestar, Perfecto Rodríguez Muíños.

Durante a xuntanza, os representantes municipais trasladaron o seu interese na ampliación de instalacións e servizo do centro mosense para enfermos de Alzheimer e outras demencias, sito en Petelos, de xeito que poida permanecer aberto de luns a venres e así eliminar a lista de espera de usuarios/as que solicitaron asistir ao mesmo.

Arévalo, Cebreiro e Rodríguez Bernárdez solicitaron tamén que este Centro de Día, que ata o de agora é 100% municipal, pase a estar integrado na Rede Galega de Centros de Día de Atención Social. Así mesmo plantexáronlle ao conselleiro Rey Varela a necesidade de continuar coa mellora do edificio da antiga Casa Reitoral de Petelos que acolle o Centro de Día de Mos.

Ademais Arévalo e Cebreiro informaron ao conselleiro de que o Centro de Día comezará agora a permanecer aberto en horario de mañá para acoller un curso dirixido a tódolos maiores de Mos que estean interesados e que leva por título ‘Cultiva a túa mente’.

A concellería de Política Social da Xunta de Galicia aprobou concederlle, dende o pasado 1 de setembro, á administración local mosense 6.812 horas anuais máis para o Servizo de Axuda no Fogar (SAF), o que supón 567,66 horas mensuais a maiores. Actualmente o SAF presta servizo a 91 mosenses beneficiarios, que representa o maior número de usuarios da historia de Mos.

A día de hoxe non queda ningún usuario de grao III (que é o grao máis grave) en lista de espera e tan só quedan pendentes 6 de grao II. En total o Concello de Mos investiu no SAF en 2017 640.022,82 euros.

Escola Infantil da Veigadaña
A Consellería de Política Social a través do Consorcio Galego de Igualdade e Benestar está a acometer tamén en Mos unha importante infraestrutura socio-educativa, a terceira Esccola Infantil A Galiña azul mosense, sita na Veigadaña.

Os traballos de construción desta Escola Infantil prevese que estarán rematados antes da vindeira primavera, data na que tamén se producirá a apertura do prazo de matrícula na mesma, ao igual que no resto de Escolas Infantís da rede ‘A Galiña Azul’. Deste xeito a Escola Infantil da Veigadaña entrará en funcionamento co inicio do curso escolar 2018-2019 (no mes de setembro), dando resposta ós 80 cativos de familias en lista de espera para matriculalos nunha Escola Infantil de Mos.

A Escola Infantil da Veigadaña será de seis unidades e está cofinanciada nun 80 % polo Fondo Europeo de Desenvolvemento Rexional (Feder) no marco do programa operativo Feder Galicia 2014-2020.

A tramitación da contratación da obra foi ordinaria e documentalmente simplificada, e tratouse dun procedemento aberto. O orzamento base de licitación era de 863.466,82 euros, IVE incluído.

O proxecto da Escola Infantil foi redactado e aprobado polo Concello de Mos. Con esta nova Escola Infantil “Mos convertirase nun Concello de referencia a nivel autonómico no que respecta ao número de prazas de Escolas Infantiles ofertadas”, segundo declaraba hoxe a rexedora local, Nidia Arévalo.

A futura nova Escola Infantil da Veigadaña será a terceira para o Concello de Mos. O novo centro infantil de 0-3 anos emprazarase na Veigadaña. Esta escola vaise converter no terceiro centro da rede autonómica ‘A Galiña Azul’ na localidade e vai elevar ata 164 as prazas públicas de educación infantil do Concello. O novo edificio constará de 82 prazas e 6 unidades.

Ademais deste novo centro na Veigadaña, a Xunta de Galicia puxo en marcha a Escola Infantil de Cototorrón (41 prazas), que abriu as súas portas en xuño de 2011. Unha vez aberta a futura gardería da Veigadaña vanse multiplicar por catro as prazas públicas de educación infantil existentes en 2009.

O Concello de Mos dispón xa de 82 prazas distribuídas en dúas escolas: a de Porteliña, que oferta 41 prazas, e a de Cototorrón, con outras 41 prazas.

A nova Escola Infantil da Veigadaña terá unha superficie útil de 600 metros cadrados, situada no núcleo rural de Veigadaña.

A terceira Escola Infantil da localidade mosense será pronto unha realidade. A alcaldesa de Mos explica neste sentido que “a necesidade dunha nova gardería era de vital importancia, dada a enorme demanda de prazas, demanda que ademais crece cada ano”, declarou Nidia Arévalo.

Dada a gran demanda de prazas de gardería que aumenta anualmente de xeito substancial, a nova Escola Infantil que se construirá en Mos será do formato de seis módulos, que é o máis grande de entre os existentes.

A nova Escola Infantil en Veigadaña configúrase cunha xeometría circular, optimizando a superficie e o aproveitamento da luz solar do edificio. Para formular a disposición dos distintos elementos, realizouse un estudo das orientacións da parcela, de modo que a zona de aulas disponse na parte sur e oeste, recibindo a máxima achega solar, mentres que a zona de servizos disponse na parte norte.

Dispóñense ademais diferentes espazos libres interiores para a realización de actividades de ocio.
Formúlase a utilización de sistemas de xeración de enerxía pasivos, tratando de adaptar o deseño do edificio aos estándares de sostibilidade. O proxecto pretende xerar un espazo interior de calidade no que alumnos e profesores poidan desenvolverse e gozar do proceso de aprendizaxe, unha actividade fundamental en idades tan temperás.

O proxecto foi realizado polos arquitectos Juan Ignacio Prieto López, Faustino Patiño Cambeiro e Estefanía Grandal Leirós (que estiveron tamén presentes hoxe na vista do xerente do Consorcio ao Concello de Mos); esta última é ademais unha novísima profesional veciña de Mos, que está a facer unha contribución de gran relevancia ó seu Concello con esta innovadora construcción de importantísima función social.