O vindeiro domingo, día 4 de febreiro, celébrase o Día Mundial contra o Cancro, por iso a directiva da Asociación Española contra o Cancro (AECC), Xunta Local de Mos, informa de que estará a partir das 19.00 horas da tarde conmemorando esta data no Centro Dotacional de Torroso, antes do monólogo que ofrecerá Pablo Carbonell.

AECC Mos pide a colaboración o domingo en Torroso de toda a veciñanza mosense para levar a cabo unha acción simbólica consistente na formación dunha gota humana de cor verde integrada polas persoas presentes que queiran participar ataviadas cun chaleco e un globo desta cor. Así, convidan a todos e a todas os e as mosenses a participar e sumarse á loita contra o cancro.

Unha vez formada a gota, inmortalizarase o momento cunha fotografía que posteriormente será difundida en redes sociais e nos medios de comunicación. A gota verde é o símbolo representativo do Día Mundial contra o Cancro.

Pola súa banda o Concello de Mos estará presente respaldando a AECC Mos, xa que sempre se suma a iniciativas deste tipo e apoia tódolos actos organizados por esta entidade.