Onte, domingo 4 de febreiro, celebrouse o Día Mundial contra o Cancro, por iso a directiva da Asociación Española contra o Cancro (AECC), Xunta Local de Mos, , -encabezada pola súa presidenta, Lidia Martínez Barbeitos- organizou a partir das 19.00 horas da tarde no Centro Dotacional de Torroso, antes do monólogo que ofreceu Pablo Carbonell, un acto simbólico ao que se sumaron tamén a alcaldesa mosense, Nidia Arévalo, e o concelleiro de Coordinación de Asociacións, Patrimonio e Servizos, Camilo Augusto.

AECC Mos agradece a colaboración en Torroso de toda a veciñanza mosense que participou, a pesar do frío, para levar a cabo esta acción simbólica consistente na formación dunha gota humana de cor verde integrada polas persoas presentes que quixeron colaborar ataviadas cun chaleco e un globo desta cor. Unha vez formada a gota, inmortalizouse o momento con fotografías. A gota verde é o símbolo representativo do Día Mundial contra o Cancro.

Pola súa banda, o Concello de Mos estivo presente respaldando a AECC Mos, xa que sempre se suma a iniciativas deste tipo e apoia tódolos actos organizados por esta entidade; e colocou na fachada da Casa Consistorial, en Petelos, un gran lazo verde tamén conmemorativo do Día Mundial contra o Cancro.