Dentro das actividades previstas "obras" do obradoiro Terras do  Miñor VI promovido pola Mancomunidade de Concellos do Val Miñor e subvencionado con Fondos Europeos e a Consellería de Economía, Emprego e Industria está a realización de Almorzos Saudables. Hoxe día 8 acollen a nenos dos colexios públicos dos tres  concellos, Baiona, Gondomar e Nigrán.

Con estes almorzos elaborados e servidos polos alumnos-traballadores do  obradoiro,  preténdese colaborar na sensibilización da adquisición de hábitos máis sans relacionados coa alimentación. O Obradoiro que comezou o día 29 de setembro xa superou o ecuador do seu proxecto.

O Presidente da Mancomunidade do Val Miñor e Alcalde de Gondomar, Paco   Ferreira, quere mostrar o seu "agradecemento pola implicación neste tipo de proxectos á Directora do Obradoiro, Marita Pintos, ao persoal docente, ao alumnado, á Concelleira de Deportes Nuria Lameiro e á Concelleira de Educación Iria Lamas, aos concelleiros de Nigrán e ao Alcalde de Baiona".

A directora Marita Pintos manifesta a súa "satisfacción pola marcha da actividade, o comedor social segue funcionando, está prevista ademais de almorzos con nenos e adultos, unha comida de San Valentín cos maiores do Val Miñor, e xornadas de portas abertas, con colexios de educación especial e outra moi importante co empresariado da zona co obxectivo de dar a coñecer aos novos profesionais formados cara á súa contratación".