A axencia de marketing online Roi Scroll, fundada en Vigo en outubro de 2014, pechou 2017 cunha facturación próxima ao millón de euros e arrinca 2018 inaugurando nova sede na rúa Policarpo Sanz 3, no quilómetro cero da de Vigo. “Grazas á confianza de clientes como Pescanova, R cable, Hijos de Rivera, Ternera Gallega ou Pizza Hut, entre moitos outros, o noso desenvolvemento foi exponencial e a anterior sede, situada en Taboada Leal, empezaba a quedar pequena”, explica Javier Barreira, CEO de Roi Scroll.

Roi Scroll viu a luz no ano 2014 despois de que o vigués, nacido en Suíza, Javier Barreira fundase outras empresas ligadas ao marketing dixital e dirixise grandes contas internacionais desde a experiencia da multinacional. “Concibín unha axencia cunha misión moi clara: contribuír a madurar a nova era dixital de Galicia a través da orientación ao cliente e o servizo a medida das necesidades de cada empresa. E o noso modelo de negocio está a funcionar, poñendo de relevo que o tecido empresarial de éxito en Galicia está a cambiar. Pechamos 2017 triplicando a facturación do ano anterior, coa satisfacción de contribuír ao abrazo da cultura dixital de decenas de empresas da nosa comunidade e coa alegría de cuadriplicar o persoal, incorporando mesmo talento emigrado”, explica o CEO de Roi Scroll.

“Hoxe en día as empresas galegas que non pensen en dixital teñen un problema para conectar cos novos públicos. Nós asesorámoslles nos seus procesos de adaptación aos ecosistemas dixitais e medios sociais, integrámonos no negocio dos nosos clientes e comprometémonos cos seus resultados coma se fosen os nosos”, sostén Laura Ma Vázquez, Client Services Director & CMO da axencia. “O noso obxectivo non é o crecemento en número de clientes senón o da mellora da calidade do noso servizo. Somos unha axencia dixital líder, que pensa estratexias e implementa accións de forma diferente. Somos orixinais, innovadores e creativos pero, sobre todo, somos próximos e de confianza. Por iso tratamos de traballar con clientes que estean na mesma sintonía que nós e gústanos pensar que somos a axencia das marcas con paixón e emoción, que aspiran ao liderado e a marcar a diferenza na vida das persoas”, explica Vázquez Viaño.

Na actualidade a axencia conta cun equipo senior especializado nas distintas disciplinas do marketing online –social media, influencer marketing, performance marketing, inbound marketing, content marketing e data driven marketing– e, ademais de estrear nova sede, a axencia renovou por completo a súa identidade corporativa e publicado nova web.

O logotipo pasou dun negro sólido, apoiado polo claim “dixital business”, a unha nova imaxe con forma cadrada, de igual lonxitude e altura, que representa o equilibrio e dá sensación de dureza e forza. O cadrado, inspirado no concepto dun píxel, ábrese por unha das súas interseccións para que tanto o espazo interior como o exterior queden en harmonía e abertos á xente, aos cambios e ao mundo que lles rodea. Así mesmo, a nova identidade corporativa da axencia busca dotar á marca de dinamismo e mocidade, con cores vivas e desenfadadas para que contrasten coa robustez do cadrado, representando así o dinamismo e actualidade dunha axencia de marketing online á vangarda da tecnoloxía dixital.