No marco do diálogo e das reunións que se están mantendo sobre a zonificación escolar de Vigo, onte abordouse o contido deste documento de traballo na reunión da Xunta de Persoal Docente na que están representadas as diferentes organizacións sindicais (Anpe, CIG, UXT, CCOO e STEG).

Foron precisamente dous inspectores educativos, que forman parte do grupo de traballo da zonificación, os encargados de explicar a proposta aos representantes sindicais, que puideron coñecer de primeira man un documento que continúa en fase de implementación.

A Xefatura Territorial de Educación continúa, así, co proceso de diálogo aberto cos distintos actores para avanzar no documento de nova zonificación de Vigo que dea resposta ás novas esixencias derivadas, sobre todo, da dinámica poboacional da cidade. O obxectivo de Educación é acadar un documento o máis consensuado posible que dea resposta ás demandas de futuro da cidade no ámbito educativo.

Precisamente a este obxectivo responden as diversas reunións de traballo levadas a cabo nos últimos meses cos directores de colexios e institutos e cos representantes das asociacións de pais e nais, que tiveron a oportunidade de coñecer de primeira man o borrador inicial e de presentar e explicar as propostas que consideraran oportunas para o documento final que aínda non está pechado.