Axentes da Xefatura da Policía Autonómica de Vigo veñen de esclarecer un incendio producido no concello pontevedrés de Ponteareas.

Os axentes procederon á imputación dun varón como presunto autor dun incendio forestal ocorrido o pasado 20 de febreiro no lugar de Chan de Gándara, parroquia de Padróns, no concello de Ponteareas. As lapas afectaron unha superficie de 0,15 hectáreas de terreo forestal arborado e raso.

O incendio iniciouse, supostamente, cando o investigado realizaba unha queima de restos forestais de xeito neglixente. Polos feitos instruíronse dilixencias remitidas ao Xulgado de Instrución nº 3 de Ponteareas.

Trátase da primeira persoa detida como presunta autora dun delito de incendio forestal na actual campaña contra incendios forestais do 2018.