En resposta ás declaracións publicadas do alcalde de Vigo, Abel Caballero, nas que di que “non bonificará aos cidadáns de Mos que viaxen no autobús de Vigo”, a rexedora local mosense, Nidia Arévalo, iniste en que “non pido ningunha bonificación especial para os mosenses, senón únicamente o que lles corresponde por lei e por dereito, para o que, dende o Concello de Mos, enviamos ao Concello de Vigo o pertinente requerimento no que instamos á devandita administración local que respecte a legalidade; non pretendemos, nin esperamos favores de Vigo, tan só que se cumpla o que a lei establece”.

Estas palabras da alcaldesa de Mos veñen refrendadas por un taxante informe da Secretaria Municipal, que certifica que “non é posible por parte do Concello de Mos a subvención das tarifas do transporte aos veciños empadroados no seu término municipal fundada no criterio do empadroamento, por contravir o principio de igualdade constitucionalmente recoñecido, e ademais por non cumprir co obxecto establecido na lei de subvencións. Polos mesmos motivos faise inviable a firma dun convenio de colaboración entre os Concellos de Vigo e Mos, coa finalidade de que o Concello de Mos financie unha bonificación das tarifas por un servizo de transporte do que é titular e presta o Concello de Vigo”.

Concluiu Arévalo lamentando profundamente a actitude de Caballero, quen afirma literalmente que “non temos que reunirnos para isto”, renunciando rotundamente á vía do diálogo que a alcaldesa mosense abriu para solucionar un problema que afecta a tantísimos veciños/as da área de Vigo. “O alcalde de Vigo esgotou a vía do diálogo que dende Mos propoñiamos para porlle solución a esta problemática que como alcaldesa tanto me preocupa, cando a veciñanza mosense que traballa na cidade olívica me traslada a súa desesperación ante á situación que se lles aveciña pola que terán que multiplicar o importe do que gastan en autobús para acudir aos seus postos de traballo, manifestando moitos deles que non poderán asumir o devandito aumento do importe a pagar cos seus soldos”, explica Nidia Arévalo, apelando á humanidade, e ao sentido común de Abel Caballero pero, sobre todo, á obriga do cumprimento das leis establecidas.