Pensionistas e xubilados do S.N. de CCOO de Galicia e de UGT-Galicia convocan para mañá, día 17 de marzo, mobilizacións na Coruña, Ferrol, Santiago, Lugo, Ourense (á que asistirán os secretarios xerais de UGT e CCOO), Pontevedra, Vigo, Vilagarcía, Viveiro, Foz, Ribeira, O Grove e O Barco de Valdeorras. Nestas protestas confluirán con outras organizacións, nomeadamente asociacións de persoas pensionistas, para demandar prestacións dignas, demandar a recuperación do poder adquisitivo das pensións e denunciar a miserable e irrisoria suba do 0,25%.

Estas mobilizacións enmárcanse nunha campaña de ámbito estatal, que xa comezou en setembro de 2017 coas marchas polas pensións dignas, e que será sostida e crecente mentres o Goberno non mude a súa postura en relación ás pensións dos xubilados deste país.

Ambos sindicatos denuncian que as pensións perden poder adquisitivo e só se revalorizan un 0,25%, en cambio, todo sube, de feito, os prezos xa se sitúan este ano nunha media interanual do1,1%.

UGT e CCOO denuncian que a pensión media sitúase en 788,49 euros en Galicia (918 euros no Estado) e que o 64% das pensións galegas non chega ao SMI.

Neste contexto, non se pode esquecer que as pensións son a fonte de ingreso de máis de nove millóns de persoas e que nos peores momentos da crise catro de cada dez pensións contribuíron a soster ao núcleo familiar.

CCOO e UGT consideran que o Goberno debe garantir xa o poder adquisitivo das pensións; erradicar o déficit da Seguridade Social e garantir o presente e futuro das pensións e do sistema público.

Ambos sindicatos denuncian a actitude do Goberno que bloquea o diálogo social e non atende as demandas sindicais nin as iniciativas aprobadas no Parlamento para garantir o poder adquisitivo das pensións e derrogar a reforma de 2013.

UGT e CCOO insisten en chamar á cidadanía galega a saír mañá ás rúas das súas vilas ou cidades porque urxe asegurar a viabilidade do sistema de pensións e non se pode permitir que o Goberno continúe esgotando o fondo de reserva e recorra a un indebido endebedamento da Seguridade Social.

Porque hai que eliminar as subvencións con cargo á Seguridade Social, cuxo custe debe asumir o Estado; porque hai que conseguir que os gastos do sistema se paguen como o resto dos organismos públicos, cos Orzamentos Xerais do Estado e non con cotizacións; porque hai que destopar as cotizacións; e porque hai que mellorar os ingresos do sistema, tanto os derivados de cotizacións como de ingresos fiscais.

Resulta fundamental protestar contra o empobrecemento duns pensionistas que perden poder adquisitivo por segundo ano consecutivo e esixir un modelo público de pensións eficaz e eficiente que é incompatible coa reforma aprobada polo Partido Popular en 2013.

As medidas impostas polo Goberno do PP nos afectan a todos, xa que o índice de revalorización e o factor de sustentabilidade supoñen a curto e medio prazo un recorte das pensións presentes e futuras e aféctannos a todos.

Por todo isto, porque nos afecta a todos, CCOO e UGT chaman á cidadanía galega no seu conxunto a participar nas mobilizacións convocadas pola recuperación do poder adquisitivo das pensións; pola revalorización das pensións segundo o IPC; pola defensa dun sistema público de pensións digno e sostible; e pola derrogación da reforma imposta polo Goberno no 2013 e a recuperación do diálogo.