O delegado da Xunta en Vigo, Ignacio López-Chaves, xunto ao xefe territorial da Consellería de Economía, Emprego e Industria, achegouse esta semana ata o CPR Colexio Hogar Afundación, para coñecer de primeira man un dos centros de referencia en formación profesional da provincia de Pontevedra.

Segundo puxo de manifesto ante o alumnado, a Formación Profesional en Galicia é hoxe sinónimo de éxito. Un éxito que, dixo, é resultado do “esforzo do profesorado e da implicación do alumnado”. O representante autonómico xustificou así a decidida aposta do Goberno galego por esta ensinanza, “imbricándoa co tecido socioproductivo de cada zona e conseguindo que o sector empresarial a concibise como unha gran oportunidade, tanto para contar con capital humano altamente cualificado como para medrar en competitividade”.