A nova Lei de espectáculos públicos e actividades recreativas de Galicia fixa entre os seus principais obxectivos “garantir a seguridade da persoas e salvagardar os dereitos dos consumidores, ao tempo que  protexe tamén o dereito ás actividades de lecer”, así por exemplo, contempla a obrigatoriedade “para realización de espectáculos públicos ou actividades recreativas en espazos abertos ao público, n on delimitados e de aforamento indeterminado, dunha póliza de seguro de responsabilidade civil por unha contía mínima de 600.000 euros de capital asegurado nos casos en que se esixa licenza ou autorización, e de 300.000 euros nos casos en que se esixa declaración responsable”.

O vicepresidente da Xunta, Alfonso Rueda, explicou recentemente o contido desta nova Lei na inauguración na Academia Galega de Seguridade Pública (AGASP) dunha xornada para abordar os aspectos xerais desta normativa, así como o seu réxime sancionador e outras cuestións de aplicación práctica.

O texto -que se publicou no DOG o pasado mes de xaneiro e entrará en vigor en xullo- elaborouse tendo en conta as achegas e suxestións de concellos e outros actores implicados, co obxectivo de acadar o máximo consenso.
A Lei, a primeira norma autonómica con rango legal en materia de espectáculos, recolle unha regulación actualizada e global que fai fincapé en garantir a seguridade das persoas e, moi especialmente, dos menores a través de medidas como a prevención do consumo de bebidas alcohólicas.

Entre outras propostas en materia de seguridade, tamén regula o servizo de control de acceso, que deberá contar con persoal habilitado; sanciona de xeito contundente a superación do aforo dun local cando comporta risco grave para as persoas; e fixa a necesidade de que os concellos conten cun Plan de inspección de espectáculos públicos.

Ademais, tamén regula outros aspectos relevantes do sector como a prohibición da revenda de entradas; ou a regulación do dereito de admisión para evitar calquera tipo de discriminación.

As festas populares baixo a lupa
As festas e verbenas populares organizadas por agrupacións ou asociacións de veciños/ as ou por comisións de festas tamén está suxeitas á Lei e “requirirán a presentación dunha declaración responsable dirixida ao concello e formulada polos veciños ou veciñas representantes da agrupación, asociación ou comisión na que se relate o programa das actividades para realizarse e as súas características”. A declaración haberá de acompañarse “do compromiso de contratación do seguro previsto na normativa en materia de espectáculos públicos e actividades recreativas de Galicia ou documentación acreditativa da dispoñibilidade do mesmo”.

A lei tamén recolle e fixa sancións polo incumprimento da normativa sobre ruído e regula a publicidade destos espectáculos ademáis de esixir la identificación dos responsables do evento para poder depurar responsabilidades en caso de ser necesario.