A Xunta de Galicia vén de abrir o prazo para solicitar praza para estadías nas residencias de tempo libre de Panxón (Pontevedra) e O Carballiño (Ourense). O Diario Oficial de Galicia (DOG) publica hoxe a convocatoria  para a adxudicación de estas estadías e servizos nas residencias adscritas á Dirección Xeral de Familia, Infancia e Dinamización Demográfica da Consellería Política Social. Os dous centros están destinados ao ocio e o lecer das familias, xa que o obxectivo desta acción é favorecer a comunicación e participación persoal e socio familiar, cumprindo desta maneira unha importante función social.

Poden beneficiarse de estadías nestas residencias tanto as persoas maiores como os menores, sempre que vaian en compañía dos seus pais e nais ou titores legais, así como os galegos e galegas residentes no exterior. O prazo para a presentación das solicitudes ábrese mañá e rematara o vindeiro 8 de maio, ambos os dous días incluídos. As inscricións deberán presentarse preferiblemente por vía electrónica a través do formulario normalizado, que está dispoñible na sede electrónica da Xunta de Galicia.

O coste da estadía é de 37,26 euros por persoa e día, sen embargo, a Administración autonómica pon á disposición das familias numerosos descontos. Deste xeito, están exentos de pago os nenos e nenas menores de dous anos que non empreguen os servizos de comedor ou que durman nas habitacións dos seus responsables. Os nenos e nenas con idades comprendidas entre os dous e os 12 anos teñen un desconto do 50%, as familias numerosas do 30%, e as persoas maiores ou con discapacidade beneficiaranse dunha rebaixa do 10% sobre o prezo final da estancia.

 

O prazo para a presentación de solicitudes ábrese mañá e rematará o 8 de maio, ambos os dous días incluídos

 

Ao igual que noutros anos, resérvase a segunda quenda do mes de xullo para as familias monoparentais, a última quenda de xullo para as familias acolledoras e a primeira quenda de agosto para as familias numerosas. A adxudicación destas quendas para as familias monoparentais, acolledoras e numerosas farase igualmente por sorteo de datas o mesmo día, sendo as sobrantes incluídas, de ser o caso, no procedemento xeral de adxudicación.

A adxudicación das prazas efectuarase por sorteo o próximo 9 de maio. Este terá lugar na Dirección Xeral de Familia e Dinamización Demográfica e será público. As prazas que queden vacantes por renuncias posteriores á súa adxudicación, ofertaranse ás persoas solicitantes que non obtivesen praza, seguindo para estes efectos a orde de publicación establecida no sorteo.