Este xoves comeza unha nova edición de  “Degusta Europa”, a actividade organizada pola Deputación de Pontevedra, arredor do Día de Europa (o 9 de maio), que volverá levar aos mercados da provincia “a innovación e vangarda gastronómica da man do alumnado dos centros Carlos Oroza de Pontevedra e Manuel Antonio de Vigo, para pór en valor os nosos mercados e produtos elaborando en directo e con produtos das nosas rías e da nosa terra unha serie de tapas inspiradas na temática europea.

 

O Centro Carlos Oroza de Pontevedra será quen poña en valor os produtos da provincia nos mercados de Lalín, Marín e Vilagarcía

 

“Degusta Europa”, que serviu máis de 20.000 tapas nos anos 2016 e 2017, chega nesta quenda da man do alumnado do Manuel Antonio aos mercados da Guarda, o 3 de maio de 11:00 a 12:00 horas, Cangas, o 4 de maio de 12:00 a 13:00 horas e ao do Progreso de Vigo, o 8 de maio de 11:00 a 12:00 horas. Ademais, da man do alumnado do Carlos Oroza, “Degusta Europa” desenvolverase en Lalín, o 10 de maio de 12:00 a 13:00 horas, Marín, o 11 de maio de 11:00 a 12:00 horas, e a Vilagarcía, o 15 de maio de 11:00 a 12:00 horas. Os obxectivos desta actividade son poñer en valor os produtos locais, recuperar a imaxe dos nosos mercados tradicionais e coñecer a labor que realizan desde estes dous potentísimos centros.

O fío condutor de “Degusta Europa” 2018 será a campaña “Somos Historias”, un nexo común cos 20 países da Unión Europea cos que a Deputación de Pontevedra ten relación a través de proxectos europeos.