Un total de 109 areais galegos lucirán o distintivo de bandeira azul este verán

A Xunta de Galicia recoñece o labor dos concellos galegos para manter a nosa Comunidade como a autonomía española nunha das primeiras posicións co maior número de bandeiras azuis en 2018. Galicia mantén a súa posición na clasificación nacional de bandeiras azuis recibidas para os areais galegos, con 109; que se eleva a 124 distincións para praias e portos deportivos; polo que a sitúa na segunda posición no número total de areais que contan con bandeira azul, despois de Valencia con 146 distincións.

Deste xeito, a comunidade galega acapara case un 25% (24,50) das 590 bandeiras azuis totais outorgadas en España pola Asociación de Educación Ambiental e do Consumidor (ADEAC) aos areais, e vai seguida no ranking nacional pola Comunidade catalana (123 bandeiras).

Nesta nova edición, o Concello de Sanxenxo volve repetir posición como o concello galego -e do conxunto do Estado- con máis bandeiras azuis, con 13 praias distinguidas. Na provincia de Pontevedra, destacan tamén o Concello de Vigo, que mantén as 9 acadadas en 2017; e a recuperación da bandeira azul para a praia de Santa Marta en Baiona; e de Areas e Caneliñas, en Sanxenxo.

 

Sanxenxo, con 13 bandeiras azuis, é o concello de España que acumula o maior número de distintivos para os seus areais

 

Na provincia da Coruña, os municipios de Arteixo e Boiro son os que máis recoñecementos deste tipo obteñen este ano, con sete; seguido de Oleiros e A Coruña, con cinco areais distinguidos. As praias de Mañóns (Boiro), Razo (Carballo) e Oza (A Coruña) volven a sumarse aos listado de areais galardoados coa bandeira azul.

Polo que respecta á provincia de Lugo, Foz é un ano máis o concello máis recoñecido, con cinco galardóns para as praias de Areoura, Peizás, Llás, As Polas e A Rapadoira; mentres que perde o distintivo para a praia da Pampillosa; e a praia do Portelo, en Burela, tamén lucirá este distintivo xunto coas praias da Marosa e Ril.

Os criterios esixidos para a obtención de bandeiras azuis están relacionados coa calidade das augas, que ten que ser excelente; a seguridade, a completa dotación de servizos, a accesibilidade, a atinada xestión ambiental e a sustentabilidade dos areais e das dársenas.

Cómpre destacar a primeira posición que ocupa Galicia en canto aos distintivos de  sendeiros azuis, xa que suma 23 itinerarios que enlazan praias ou portos con bandeira azul e contribúen ao uso sostible do litoral. (Ao final das táboas coa relación de bandeiras azuis para os areais galegos, indícanse os sendeiros distinguidos).

 

A rexión galega acapara case un 25% das 590 bandeiras azuis outorgadas a praias españolas pola Asociación de Educación Ambiental e do Consumidor

 

Portos deportivos, centros e sendeiros azuis
En relación aos portos deportivos, en 2018 Galicia obtén 15 galardóns, sendo a provincia da Coruña a primeira en encabezar a lista con sete portos, seguida por Pontevedra con seis e dous da provincia de Lugo.

É de destacar que Galicia tamén recibe a distinción para 17 centros azuis, dous máis que na anterior edición, dun total de 74 en toda España. O requisito para converterse en centro azul para un concello con bandeira azul ás súas praias ou portos, é a existencia dun centro de visitantes, aula do mar ou de natureza que ofreza educación ambiental sobre os ecosistemas litorais e o desenvolvemento sostible, así como información específica e/ou actividades relacionadas co programa Bandeira Azul. O municipio que queira optar a esta distinción debe presentar un dossier xustificativo da súa proposta, así como, ao ano seguinte, a memoria anual da actividade, xunto coa súa candidatura, que xustifique o mantemento da súa condición como centro azul en anos sucesivos. Por estes motivos, a Xunta de Galicia felicita aos concellos de Bueu, Sanxenxo, Illa de Arousa, Vigo, Redondela, Marín, Oleiros, Boiro, Muros, A Laracha, Camariñas, Burela e Cervo, por ser quen de manter estes recoñecementos.

A continuación detállase por provincias, concellos e areais e indicase en amarelo as praias con nova bandeira nesta edición: