Un total de 28 persoas xa traballan nos montes de Vigo grazas ao Plan de Emprego do Concello para recuperar os montes queimados o pasado outono e protexelos de cara a vindeira temporada estival.

O alcalde de Vigo, Abel Caballero, visitaba fai uns días o parque forestal de Beade, onde unha decena de operarios contratados a través do Plan de Emprego estaban levando a cabo nese momento labores de retirada de maleza e madeira queimada. Esta novo iniciativa municipal está encamiñada ao plan de protección dos montes de Vigo.

"Levamos moitos anos facendo isto e afortunadamente estaban limpos cando rexistrouse o incendio pavoroso de outubro, se non sería moito peor, porque os montes privados non estaban en condicións", sinalou o alcalde.

Coa contratación de 28 persoas (un capataz, un auxiliar administrativa e 26 peóns) procederase a limpeza de 600 hectáreas de montes comunais. A actuación conta cunha partida de 140.000 euros e está encamiñada a retirar, en primeiro lugar, a madeira queimada, que non é de uso comercial e non pode aproveitarse.

O rexedor tamén avanzou que a partir do mes de novembro empezarán os traballos de reforestación. "Facemos o noso traballo, sempre o facemos, pero é unha pena que a Xunta non contrate outros 25 ou 30 traballadores, porque teríamos o dobre de capacidade de actuación", sinalou Caballero.