O concello de Tomiño pechou o pasado exercicio con estabilidade orzamentaria, é dicir, que os gastos non sobre pasaron os ingresos; así como cumprindo a regra de gasto. Deste xeito, no 2017 obtívose un superávit de 947.702,95 euros, tal coma reflicte o cálculo obxectivo de estabilidade orzamentaria, realizado polo Departamento de intervención. Destes e outros datos, deuse conta no último pleno ordinario, tal coma a lei o require.

Asemade, existe a obriga legal de comprobar, coa liquidación dos orzamentos, o cumprimento do obxectivo da Regra de Gasto que, segundo os informes preceptivos, cómprese no caso de Tomiño.

Do mesmo xeito, o nivel de débeda do Concello, estaría moi por debaixo do 75% dos ingresos correntes.

O concelleiro de Fazenda, Uxío Benítez, explica que “o Concello foi responsable na execución do gasto, axustando o que se gasta aos ingresos previstos”.

A Alcaldesa, Sandra González, pola súa banda salienta que “o máis importante, ademais destas cuestión técnicas de boa execución orzamentaria, é que o Concello de Tomiño segue destacando pola puntualidade nos pagos aos provedores, estando a media en menos de trinta días. “O concello é solvente economicamente e ten un nivel de execución óptimo, o que nos permite estar satisfeitos coa nosa xestión económica, agradecendo a labor de concelleiros, concelleiras e do equipo de intervención, que realiza a xestión diaria”, comentou a rexedora.