Vigo converterase no epicentro das ciencias mariñas por uns días. Arredor de 500 investigadores e investigadoras de 14 países daranse cita os vindeiros 20, 21 e 22 de xuño no Auditorio Mar de Vigo no VI International Symposium on Marine Sciences, a cita máis importante para as ciencias mariñas en España, xa que por primeira vez aglutina nun mesmo sitio e data a seis simposios de referencia internacional: ISMS, EOF, Siquimar, Redibal, ISC CDM e o workshop Patrimonio Cíes. Promovido pola Conferencia de Decanos de Ciencias do Mar de España e as universidades de Vigo, Valencia, Gran Canaria, Barcelona, Cádiz e Alacante, CSIC e Instituto Español de Oceanografía, o ISMS conta tamén nesta edición coa colaboración do Concello de Vigo.

“Estamos ante un congreso de gran importancia a nivel mundial e no eido das ciencias mariñas Vigo ten un ámbito de excelencia e aos mellores investigadores e investigadoras do mundo”, salientou alcalde de Vigo, Abel Caballero, que quixo tamén “agradecer aos comités organizadores de cada un dos simposios a súa implicación, o seu traballo e o enorme esforzo que veñen realizando ao longo destes meses, asegurando así a máxima calidade científica do evento nunha contorna incomparable”. Fíxoo durante a presentación do ISMS no Concello de Vigo, na que estivo acompañado polo reitor da Universidade de Vigo, Manuel Reigosa; pola Vicerreitora de Investigación e coordinadora do simposio, Belén Rubio; e pola decana da Facultade de Ciencias do Mar, Ana Bernabeu.

O reitor, Manuel Reigosa, aproveitou a oportunidade para salientar a importancia do mar e das ciencias mariñas para a Universidade de Vigo, que crece ao carón “dunha ría que cimenta á cidade e á universiade”. Pola súa banda, Belén Rubio, vicerreitora de Investigación e coordinadora do ISMS, destacou a importancia dos seis conferenciantes plenarios, Óscar Romero, Jörg Schäfer, Aída Alvera, Marina Montresor, Jorge Cortés e Ricardo Torres.

Tres días e seis congresos

Vigo será durante tres días punto de encontro entre persoas investigadoras, expertos e expertas, alumnado e profesionais do ámbito das ciencias de ata 74 cidades de países como España, Portugal, México, Colombia, Costa Rica, Arxentina, Chile, Perú, Reino Unido, Alemaña, Irlanda, Países Baixos, Brasil, Italia e Tunisia. Con 420 comunicacións e pósteres, o ISMS servirá de un escaparate dos avances científicos que se están a conseguir en distintos eidos.

Aínda que ten un marcado carácter científico, o simposio tamén terá unha parte aberta ao público: a cidadanía poderá participar na mesa de debate ‘A muller e a ciencia’, que se celebrará o xoves 21 ás 19.30 horas, ou no workshop Patrimonio Cíes.

O ISMS é o paraugas baixo o que se porán en marcha seis simposios:

• O ISMS, onde investigadoras e investigadoras do sector terá a oportunidade de expoñer os resultados e conclusións dos seus estudos en diferentes áreas de investigación mariña e onde o alumnado poderá difundir os resultados dos seus traballos de Fin de Grao ou de Máster.
• EOF, o Encontro da Oceanografía Física 2018. Organizado polas universidades de Vigo, Las Palmas de Gran Canaria e Aveiro, o Consejo Superior de Investigaciones Científicas (CSIC) e o Instituto Español de Oceanografía (IEO), permitirá á comunidade de la Oceanografía Física española e portuguesa divulgar os últimos avances alcanzados, establecer sinerxías e crear unha valiosa rede de colaboracións.
• SIQUIMAR, o Seminario Ibérico de Química Mariña, que constitúe unha continua entre científicos españois e portugueses que empregan a química e as súas ferramientas para o estudo dos procesos mariños.
• REDIBAL. XIII Reunión Ibérica de Algas tóxicas e biotoxinas mariñas. Busca a transferencia de coñecemento entre investigadores para enfrontar novos retos e futuros desafíos vencellados coas microalgas nocivas mariñas.
• ISC CDM. Campus do Mar ISC’18, organizado polo Campus do Mar da Universidade de Vigo, preséntase como un valioso foro para debatir novos progresos en investigación, tecnoloxía e xestión mariña.
• Monográfico sobre a candidatura das Illas Cíes, que ten por obxectivo seguir apostanto polo fortalecemento científico da candidatura das illas a Patrimonio da Humanidade, un dos piares e fortalezas do proxecto. O VI ISMS rematará cunha saída de campo ás illas Cíes na que varios expertos e expertas explicarán aos participantes distintos aspectos do arquipélago que axudarán a mellorar o coñecemento científico sobre este Parque Nacional.